سمرا نشیب میں دریائی کٹاؤ، وزیراعلیٰ پنجاب کا فوری نوٹس، سٹڈ بند کی تعمیر کا حکم

لیہ: سمرا نشیب میں دریائی کٹاؤ، وزیراعلیٰ پنجاب کا فوری اقدامات کا حکم۔وزیراعلیٰ پنجاب مریم نواز شریف کو سمرا نشیب میں دریائی کٹاؤ کی صورتحال کے بارے میں رپورٹ پیش کر دی گئی۔ وزیراعلیٰ پنجاب نے صورتحال کا فوری نوٹس لیتے ہوئے سخت اظہار برہمی کرتے ہوئے چیف انجینئر انہار ڈی جی خان اور سرگودھا کو فوری طور پر موقع پر پہنچ کر صورتحال کا جائزہ لینے اور ضروری اقدامات یقینی بنانے کی ہدایت کر دی۔وزیراعلیٰ پنجاب کی ہدایت پر پی ڈی ایم اے کو بھی ضروری مشینری کے ہمراہ موقع پر پہنچنے اور دریائی کٹاؤ کی روک تھام کے لیے فوری طور پر سٹڈ بند تعمیر کرنے کے احکامات جاری کر دیے گئے ہیں۔ متعلقہ افسران، عملہ اور ضروری مشینری سمرا نشیب کی جانب روانہ کر دی گئی ہے۔تفصیلات کے مطابق سمرا نشیب میں دریائے سندھ کے کٹاؤ کے باعث آبادی اور قیمتی اراضی کے نقصانات کے پیش نظر معاون خصوصی چیف منسٹر انسپکشن ٹیم نے وزیراعلیٰ پنجاب کو رپورٹ پیش کر دی۔ وزیراعلیٰ پنجاب نے متاثرہ علاقے میں فوری حفاظتی اقدامات اور مشینری کی فراہمی یقینی بنانے کی ہدایت کی تاکہ مزید کٹاؤ کو روکا جا سکے اور مقامی آبادی کو تحفظ فراہم کیا جا سکے۔ڈپٹی کمشنر آصف علی ڈوگر نے متعلقہ افسران کو ہدایت کی ہے کہ متاثرہ خاندانوں کو کھانے، راشن کی فراہمی، صحت سہولیات، ٹرانسپورٹیشن کی فراہمی برقرار رکھی جائے اور صورتحال کی مسلسل نگرانی کی جائے جبکہ متعلقہ محکموں کو باہمی رابطے کے ساتھ حفاظتی اقدامات مکمل کرنے کی ہدایت کی گئی ہے۔