وزیراعلیٰ پنجاب کے پی آئیز پر جائزہ اجلاس، پرائس کنٹرول اور صفائی نظام مؤثر بنانے کی ہدایت

لیہ: ایڈیشنل ڈپٹی کمشنر میونسپل سروسز شبیر احمد ڈوگر کی زیر صدارت وزیراعلیٰ پنجاب کے پی آئیز سے متعلق جائزہ اجلاس منعقد ہوا۔ اجلاس میں متعلقہ محکموں کے افسران موجود تھے۔ اے ڈی سی شبیر احمد ڈوگر نے اجلاس سے خطاب کرتے ہوئے کہا کہ وزیراعلیٰ پنجاب کے طے کردہ انڈیکیٹرز حکومت پنجاب کی ترجیحات کا عملی مظہر ہیں جن پر بروقت اور مؤثر عملدرآمد ہر محکمے کی اولین ذمہ داری ہے۔ انہوں نے کہا کہ صفائی کے نظام کو مزید بہتر بنایا جائے اور شہری علاقوں کے ساتھ دیہی علاقوں میں بھی صفائی کے انتظامات کو مؤثر بنایا جائے تاکہ عوام کو صاف ستھرا ماحول فراہم کیا جا سکے۔ اجلاس میں پرائس کنٹرول مجسٹریٹس کی کارکردگی کا تفصیلی جائزہ لیا گیا۔ اے ڈی سی شبیر احمد ڈوگر نے اس موقع پر کہا کہ پرائس کنٹرول حکومت پنجاب کی اہم ترجیح ہے اور اس میں کسی قسم کی غفلت برداشت نہیں کی جائے گی۔ انہوں نے کہا کہ شہریوں کو مقررہ نرخوں پر اشیائے خوردونوش کی فراہمی ہر صورت یقینی بنائی جائے۔ انہوں نے ہدایت کی کہ پرائس کنٹرول مجسٹریٹس فیلڈ میں اپنی موجودگی مزید بڑھائیں روزانہ کی بنیاد پر مارکیٹ چیکنگ کریں، ریٹ لسٹس آویزاں کروائیں اور گرانفروشی میں ملوث افراد کے خلاف بلاامتیاز کارروائی عمل میں لائیں۔ انہوں نے مزید ہدایت کی کہ سڑکوں اور گلیوں میں گٹروں کے ٹوٹے ہوئے ڈھکن فوری طور پر درست اور تبدیل کیے جائیں تاکہ شہریوں کو کسی بھی حادثے سے محفوظ رکھا جا سکے۔ انہوں نے کہا کہ سکولوں کے سامنے زیبرا کراسنگز کو بھی درست حالت میں رکھا جائے اور جہاں ضرورت ہو وہاں زیبرا کراسنگز کو واضح اور مؤثر بنایا جائے تاکہ طلبہ اور شہریوں کو سڑک عبور کرنے میں سہولت اور تحفظ فراہم ہو۔