چوک اعظم میں ستھرا پنجاب کا صفائی آپریشن، آلات کی کمی کا نوٹس، فوری فراہمی کی ہدایت

لیہ:ایڈیشنل ڈپٹی کمشنر میونسپل سروسز/منیجنگ ڈائریکٹر ستھرا پنجاب شبیر احمد ڈوگر نے صبح سویرے چوک اعظم کا دورہ کیا اور مختلف علاقوں میں ستھرا پنجاب ٹیموں کی جانب سے جاری صفائی آپریشن کا تفصیلی جائزہ لیا۔ انہوں نے مختلف وارڈز میں صفائی ورکرز کی حاضری، گھر گھر سے کوڑا کرکٹ اٹھانے، دستی صفائی، نالوں کی صفائی، کوڑا کرکٹ کے مراکز اور دیگر مقامات پر صفائی کے انتظامات کا معائنہ کیا۔اس موقع پر انہوں نے صبح کی شفٹ میں کام کرنے والی ستھرا پنجاب ٹیموں کی کارکردگی کا جائزہ لیتے ہوئے صفائی ورکرز کی ڈیوٹی پر موجودگی کو چیک کیا۔ انہوں نے مختلف محلوں کا دورہ کرکے شہریوں سے بھی صفائی کے انتظامات کے بارے میں معلومات حاصل کیں اور صفائی سے متعلق ان کی رائے جانی۔ایم ڈی ستھرا پنجاب شبیر احمد ڈوگر نے صفائی کے لیے استعمال ہونے والے آلات کا بھی معائنہ کیا اور بعض مقامات پر آلات کی کمی کا نوٹس لیتے ہوئے متعلقہ ٹھیکیدار کو چوک اعظم میں صفائی ورکرز کے لیے مطلوبہ تعداد میں مناسب آلات فوری فراہم کرنے کی ہدایت کی۔ انہوں نے کہا کہ صفائی آپریشن میں کسی قسم کی غفلت برداشت نہیں کی جائے گی اور شہریوں کو صاف ستھرا ماحول فراہم کرنے کے لیے فیلڈ میں موجودگی اور صفائی کے معیار کو ہر صورت یقینی بنایا جائے۔اس موقع پر ڈسٹرکٹ منیجر محمد عابد ندیم اور تحصیل انچارج قدرت اللہ بھی ان کے ہمراہ تھے۔