لیہ: وزیر اعلیٰ پنجاب مریم نواز شریف کا اہلیان لیہ کے لئے ایک اور تحفہ۔ لیہ میں دو جدید سہولت بازاروں کے قیام کی منظوری دے دی۔ 92 کروڑ روپے کے منصوبہ کے لئے ٹینڈر جاری کر دئے گئے۔وزیراعلیٰ پنجاب مریم نواز شریف نے ضلع لیہ میں دو جدید اور اسٹیٹ آف دی آرٹ سہولت بازاروں کے قیام کی منظوری دے دی ہے۔ دونوں سہولت بازاروں کے قیام پر مجموعی طور پر تقریباً 92 کروڑ روپے لاگت آئے گی، جبکہ منصوبے کے لیے ٹینڈر بھی جاری کر دیا گیا ہے۔ ڈپٹی کمشنر آصف علی ڈوگر کے مطابق ضلع لیہ میں ایک سہولت بازار لیہ شہر جبکہ دوسرا فتح پور میں قائم کیا جائے گا۔ ڈپٹی کمشنر نے کہا کہ یہ سہولت بازار صرف اشیائے ضروریہ کی فراہمی تک محدود نہیں ہوں گے بلکہ عوام کو جدید کاروباری، تفریحی اور خریداری کی سہولیات بھی میسر آئیں گی۔ منصوبے سے کاروباری سرگرمیوں کو فروغ ملنے کے ساتھ روزگار کے نئے مواقع پیدا ہوں گے اور شہریوں کو ایک ہی جگہ پر متعدد سہولیات دستیاب ہوں گی۔ انہوں نے بتایا کہ منصوبے میں ماڈل مارکیٹس کے علاوہ فوڈ کورٹ، جوائے لینڈ، پلے لینڈ اور دیگر عوامی سہولیات بھی شامل ہوں گی۔ جدید سہولت بازاروں کے قیام سے مقامی کاروبار کو فروغ، سرمایہ کاری کے نئے مواقع اور عوام کے لیے بہتر تجارتی و تفریحی ماحول میسر آئے گا۔ ڈپٹی کمشنر آصف علی ڈوگر نے کہا کہ سہولت بازاروں کا منصوبہ ضلع لیہ میں معاشی سرگرمیوں کے فروغ، روزگار کے نئے مواقع پیدا کرنے اور عوام کو جدید شہری سہولیات کی فراہمی کی جانب اہم قدم ثابت ہوگا۔
