کروڑ لعل عیسن میں ستھرا پنجاب صفائی آپریشن کا جائزہ، جلوس روٹس کی بروقت صفائی یقینی بنانے کی ہدایت

لیہ: اسسٹنٹ کمشنر تحصیل کروڑ اصغر علی چیمہ نے بستی کلیان کروڑ لعل عیسن کا دورہ کیا اور ستھرا پنجاب ٹیموں کی جانب سے جاری صفائی ستھرائی کے عمل کا جائزہ لیا۔ اس موقع پر انہوں نے مختلف وارڈز، شاہراہوں اور دیگر مقامات پر صفائی کی صورتحال، ستھرا پنجاب ٹیموں کی حاضری اور فیلڈ میں موجودگی کا معائنہ کیا جبکہ صفائی آپریشن کو بلا تعطل جاری رکھنے کی ہدایات جاری کیں۔اس موقع پر متعلقہ افسران اور ستھرا پنجاب ٹیموں کے نمائندگان بھی موجود تھے۔ اسسٹنٹ کمشنر اصغر علی چیمہ نے کہا کہ شہر میں صفائی ستھرائی کے معیار پر کسی قسم کا سمجھوتہ نہ کیا جائے اور صفائی آپریشن کو مؤثر انداز میں جاری رکھا جائے۔ انہوں نے خصوصی طور پر عید میلاد النبی ﷺ کے جلوس روٹس پر صفائی ستھرائی کے مثالی انتظامات یقینی بنانے اور روٹس کو بروقت صاف رکھنے کی ہدایت کی۔اسسٹنٹ کمشنر نے صفائی کے انتظامات کے حوالے سے عوامی رائے جاننے کے لیے شہریوں سے بھی بات چیت کی اور ان سے صفائی کی صورتحال اور ستھرا پنجاب ٹیموں کی کارکردگی کے بارے میں معلومات حاصل کیں۔