لیہ میں عید میلاد النبی ﷺ کی تیاریاں، مرکزی میلاد گراؤنڈ میں پنڈال، چراغاں اور بنیادی سہولیات کی فراہمی کا فیصلہ

لیہ: ایڈیشنل ڈپٹی کمشنر ہیڈ کوارٹر محمد اویس سرور کی زیر صدارت عید میلاد النبی ﷺ کے انتظامات کے حوالے سے اجلاس منعقد ہوا۔ اجلاس میں سی او ضلع کونسل محمد فیصل، ممبران میلاد کمیٹی عطاء الرحمان،حاجی احمد کلاسرا،حسن رضا،افتخار چشتی،قاضی شفقت اللہ،قاری غلام یاسین،اعجاز حسین،ملازم حسین کوثر،جاوید حسین،شفقت احمد،محمد عمران ودیگر نے شرکت کی۔ اجلاس میں جشن عید میلاد النبی کے سلسلہ میں کیے جانے والے انتظامات کا تفصیلی جائزہ لیا گیا۔ ممبران میلاد کمیٹی نے مرکزی تقریب، جلوسوں کے روٹس، صفائی ستھرائی، روشنی، پنڈال، ٹریفک، پارکنگ، پینے کے صاف پانی اور دیگر ضروری انتظامات کے حوالے سے مختلف تجاویز پیش کیں۔ اس موقع پر اے ڈی سی محمد اویس سرور نے کہا کہ عید میلاد النبی کے موقع پر بہترین انتظامات یقینی بنائے جائیں گے مرکزی میلاد گراؤنڈ میں پنڈال کو خوبصورتی سے سجایا جائے گا اور روشنی و چراغاں کا خصوصی انتظام کیا جائے گا۔ انہوں نے کہا کہ شرکاء کے بیٹھنے کے لیے مناسب تعداد میں کرسیاں فراہم کی جائیں گی جبکہ صفائی ستھرائی، پینے کے صاف پانی اور دیگر بنیادی سہولیات کی فراہمی کو یقینی بنایا جائے گا۔ انہوں نے کہا کہ جلوسوں کے روٹس پر بھی صفائی اور لائٹنگ کے انتظامات مکمل کیے جائیں گے اور عاشقان رسول میں شیرینی کی تقسیم کے لیے بھی خصوصی انتظامات کئے جائیں گے۔