لیہ: وزیر اعلیٰ پنجاب انسپیکشن ٹیم کے فوکل پرسن شعیب مرزا نے ڈسٹرکٹ ہیڈکوارٹر ہسپتال لیہ کا دورہ کیا اور مریضوں کو فراہم کی جانے والی طبی سہولیات، ہسپتال کے انتظامی امور اور مجموعی سروس ڈلیوری کا جائزہ لیا۔ اس موقع پر ڈپٹی کمشنر لیہ آصف علی ڈوگر بھی ان کے ہمراہ تھے۔ فوکل پرسن سی ایم پنجاب انسپیکشن ٹیم شعیب مرزا نے ہسپتال کے ایمرجنسی وارڈ، گائنی وارڈ، چلڈرن وارڈ، میڈیکل وارڈ سمیت مختلف شعبہ جات کا معائنہ کیا۔ انہوں نے ہسپتال میں صفائی ستھرائی کے انتظامات، ادویات کی دستیابی، مریضوں کے لیے موجود سہولیات، عملے کی حاضری اور علاج معالجے کے مجموعی نظام کا جائزہ لیا۔ دورہ کے دوران فوکل پرسن شعیب مرزا نے زیر علاج مریضوں اور ان کے لواحقین سے بھی گفتگو کی اور ان سے علاج معالجے، ادویات کی دستیابی اور ہسپتال میں فراہم کی جانے والی سہولیات کے بارے میں دریافت کیا۔ انہوں نے مریضوں کے مسائل اور ہسپتال میں ان کے تجربات کے بارے میں بھی معلومات حاصل کیں۔ اس موقع پر گفتگو کرتے ہوئے فوکل پرسن شعیب مرزا نے کہا کہ وزیر اعلیٰ پنجاب مریم نواز شریف کی ہدایات کے مطابق سرکاری ہسپتالوں میں عوام کو معیاری اور بروقت طبی سہولیات کی فراہمی کے لیے اقدامات کیے جا رہے ہیں۔ انہوں نے کہا کہ صحت عامہ حکومت پنجاب کی اہم ترجیحات میں شامل ہے اور عوام کو علاج معالجے کی بہتر سہولیات فراہم کرنے کے لیے دستیاب وسائل کو مؤثر انداز میں بروئے کار لایا جا رہا ہے۔ شعیب مرزا نے کہا کہ سرکاری ہسپتالوں میں مریضوں کو بہتر ماحول، ضروری ادویات اور معیاری طبی سہولیات کی فراہمی پر خصوصی توجہ دی جا رہی ہے۔ انہوں نے ہسپتال میں فراہم کی جانے والی سہولیات اور مجموعی انتظامات کا جائزہ لیتے ہوئے اطمینان کا اظہار کیا۔ انہوں نے مزید کہا کہ وزیر اعلیٰ پنجاب کی ہدایات کے مطابق سرکاری ہسپتالوں کی کارکردگی اور عوام کو فراہم کی جانے والی طبی سہولیات کا جائزہ لینے کا سلسلہ جاری ہے تاکہ صحت کے شعبے میں بہتری کے اقدامات کو مزید مؤثر بنایا جا سکے۔ اس موقع پر چیف ایگزیکٹو آفیسر صحت ڈاکٹر شاہد ریاض،ایم ایس ڈاکٹر حیات اللہ بھی ہمراہ تھے۔
