لیہ: حکومت پنجاب کی ہدایات پر ڈسٹرکٹ ٹریفک پولیس لیہ کی جانب سے ٹریفک ایجوکیشن یونٹ نے فتح پور شہر میں سی ایم اے کالج، مدرسہ جامعہ حسنیہ رضویہ اور مدرسہ دارالقرآن فتح پور میں طلباء کے لیے خصوصی آگاہی سیشنز کا انعقاد کیا۔ اس موقع پر طلباء کو روڈ سیفٹی اور ٹریفک قوانین کے حوالے سے تفصیلی لیکچر دیا گیا۔ٹریفک ایجوکیشن یونٹ کے اہلکاروں نے طلباء کو جوینائل ڈرائیونگ پرمٹ، ہیلمٹ کے لازمی استعمال، موٹر سائیکل پر سائیڈ مررز کی تنصیب، فینسی اور بغیر نمبر پلیٹ گاڑیوں کے استعمال، مقررہ رفتار کی پابندی، اوور لوڈنگ، ون وے کی خلاف ورزی اور دورانِ ڈرائیونگ موبائل فون کے استعمال سے اجتناب کے حوالے سے آگاہی فراہم کی۔ اس موقع پر بتایا گیا کہ ٹریفک قوانین کی پابندی نہ صرف قانونی تقاضا بلکہ اپنی اور دوسروں کی جان و مال کے تحفظ کے لیے بھی ضروری ہے۔طلباء نے آگاہی سیشن کو مفید قرار دیتے ہوئے ٹریفک قوانین پر عملدرآمد اور محفوظ ٹریفک کلچر کے فروغ میں اپنا کردار ادا کرنے کے عزم کا اظہار کیا۔
