لیہ: سیکیورٹی فورسز نے بلوچستان کے علاقے پنجگور، کلی سوران میں انٹیلی جنس بیسڈ آپریشن کرتے ہوئے 5 دہشتگردوں کو ہلاک جبکہ متعدد کو زخمی کر دیا۔ سیکیورٹی ذرائع کے مطابق دہشتگرد موٹرسائیکلوں پر سوار ہو کر دہشتگردی کی کارروائی کے لیے جا رہے تھے، جنہیں جدید ٹیکنالوجی اور ہتھیاروں کی مدد سے نشانہ بنایا گیا۔
سیکیورٹی ذرائع کا کہنا ہے کہ کارروائی کے دوران ہلاک دہشتگردوں کے قبضے سے جدید اسلحہ اور بھاری مقدار میں گولہ بارود برآمد کیا گیا۔ برآمد ہونے والے سامان میں 3 گاڑیاں، 2 موٹرسائیکلیں، آئی ای ڈی ڈیوائس اور کالعدم تنظیم کا جھنڈا بھی شامل ہے۔
ذرائع کے مطابق ہلاک دہشتگرد لوٹ مار، اغوا، ٹارگٹ کلنگ اور خودکش حملوں کی منصوبہ بندی میں ملوث تھے۔ سیکیورٹی فورسز کی جانب سے علاقے میں مزید کلیئرنس اور سرچ آپریشن جاری ہے۔
