لیہ:ڈپٹی کمشنر آصف علی ڈوگر کی ہدایت پر سڑکوں کی حفاظت اور دیکھ بھال کے لیے قائم ’’کسٹوڈین آف روڈز‘‘ کمیٹی کی نگرانی جاری۔اس سلسلہ میں اسسٹنٹ کمشنر تحصیل کروڑ اصغر علی چیمہ نے متعلقہ افسران کے ہمراہ مین روڈ کا دورہ کرکے سڑکوں کی صفائی ستھرائی، نکاسی آب اور سڑک کے اطراف کی صورتحال کا جائزہ لیا۔ اس موقع پر سی او اور ٹی ایم ڈبلیو ایم سی کے افسران بھی ان کے ہمراہ تھے۔ اسسٹنٹ کمشنر اصغر علی چیمہ نے متعلقہ عملہ کو ہدایت کی کہ سڑکوں اور ان کے اطراف صفائی ستھرائی کے انتظامات کو مزید بہتر بنایا جائے اور کوڑا کرکٹ کی بروقت صفائی یقینی بنائی جائے۔ انہوں نے کہا کہ بارش کی صورت میں سڑکوں پر پانی جمع نہ ہونے دیا جائے اور جمع شدہ پانی کی فوری نکاسی کے لیے مؤثر انتظامات کیے جائیں تاکہ سڑکوں کو نقصان سے محفوظ رکھا جا سکے۔ انہوں نے سڑکوں کے کناروں کی صورتحال کا بھی جائزہ لیا اور متعلقہ حکام کو ہدایت کی کہ سڑکوں کے کناروں کو مضبوط بنانے اور ٹوٹ پھوٹ سے محفوظ رکھنے کے لیے ضروری اقدامات کیے جائیں۔
