لیہ: ڈپٹی کمشنر آصف علی ڈوگر نے کہا ہے کہ 286 بستروں پر مشتمل جدید جنرل ہسپتال لیہ کا 95 فیصد تعمیراتی کام مکمل کر لیا گیا ہے، جبکہ ضروری طبی آلات کی تنصیب، کمیشننگ اور ٹیسٹنگ کا عمل جاری ہے۔ ہسپتال کو رواں سال اکتوبر تک مکمل کرنے کا ہدف مقرر کیا گیا ہے۔
ڈپٹی کمشنر کے مطابق وزیر اعلیٰ پنجاب مریم نواز شریف کے وژن کے تحت جنرل ہسپتال کے منصوبے کا دائرہ کار 200 سے بڑھا کر 286 بستروں تک کر دیا گیا ہے، جبکہ منصوبے کے لیے مزید 2 ارب روپے سے زائد کے منظور شدہ فنڈز بھی موصول ہو چکے ہیں، جس سے تعمیراتی کام میں تیزی آئی ہے۔
انہوں نے بتایا کہ ہسپتال میں چار آپریشن تھیٹرز بیک وقت فعال ہوں گے جبکہ کارڈیالوجی، یورولوجی، گائنی، نرسری اور پیتھالوجی سمیت مختلف شعبہ جات قائم کیے جائیں گے۔ ہسپتال میں کیتھ لیب، سی ٹی سکین، ایکسرے اور اینجیوگرافی سمیت جدید طبی و تشخیصی سہولیات بھی فراہم کی جائیں گی۔
ڈپٹی کمشنر نے مزید بتایا کہ ہسپتال کے احاطے میں گراسی پلاٹس کی تیاری اور نمائشی و سایہ دار پودوں کی شجرکاری کا عمل بھی جاری ہے۔ جنرل ہسپتال کی تکمیل کے بعد فیز ٹو کے تحت رہائشی بلاک کی تعمیر شروع کی جائے گی۔
انہوں نے کہا کہ سینٹرلی ایئر کنڈیشنڈ جنرل ہسپتال لیہ جنوبی پنجاب کے جدید طبی مراکز میں شامل ہوگا، جہاں ضلع لیہ سمیت ملحقہ اضلاع کے عوام کو معیاری علاج معالجے کی سہولیات میسر آئیں گی۔
