لیہ:ڈپٹی کمشنر لیہ آصف علی ڈوگر نے ضلع کو سرسبز و شاداب بنانے کے لیے ایگری فاریسٹری کلچر کو فروغ دینے کا فیصلہ کیا ہے۔ تحصیل چوبارہ میں سرکاری و نجی غیر آباد زمینوں پر جنگلات لگانے کے لیے جامع پروگرام تشکیل دیا جائے گا۔
یہ فیصلہ ڈپٹی کمشنر آصف علی ڈوگر کی زیر صدارت منعقدہ اجلاس میں کیا گیا۔ اجلاس میں ایڈیشنل ڈپٹی کمشنر جنرل شبیر احمد ڈوگر، اسسٹنٹ کمشنر لیہ زوہیب کریم، ڈپٹی کنزرویٹر فاریسٹ سجاد حیدر شاہ، سی او ضلع کونسل محمد فیصل اور دیگر متعلقہ افسران نے شرکت کی۔
اجلاس سے خطاب کرتے ہوئے ڈپٹی کمشنر نے کہا کہ سرکاری و نجی غیر آباد زمینوں پر ایگری فاریسٹری کلچر کو فروغ دیا جائے، جس سے گرین پنجاب انیشیٹو کو مزید تقویت ملے گی اور مقامی زمینداروں کو مالی معاونت کے مواقع بھی حاصل ہوں گے۔
انہوں نے متعلقہ محکموں کو ہدایت کی کہ مقامی زمینداروں کے تعاون سے منظم حکمت عملی کے تحت جنگلات لگانے کا پروگرام تشکیل دیا جائے اور غیر آباد زمینوں کو شجرکاری کے لیے مؤثر انداز میں استعمال کیا جائے۔
آصف علی ڈوگر نے کہا کہ جنگلات کے فروغ سے نہ صرف علاقے میں معاشی خوشحالی آئے گی بلکہ ماحولیاتی آلودگی اور گلوبل وارمنگ کے اثرات کم کرنے میں بھی مدد ملے گی۔ لیہ کو سرسبز و شاداب ضلع بنانے کے لیے تمام متعلقہ محکمے مربوط انداز میں اقدامات کریں۔
