لیہ: ڈپٹی کمشنر لیہ آصف علی ڈوگر نے کہا ہے کہ لیہ چوک اعظم روڈ پر قائم 15 کلومیٹر طویل گرین بیلٹ کو خوبصورت اور سرسبز بنا کر لیہ کی پہچان بنائیں گے۔ گرین بیلٹ کی ہریالی برقرار رکھنے کے لیے تمام متعلقہ محکمے اپنی ذمہ داریاں احسن انداز میں انجام دیں۔
انہوں نے یہ بات گرین بیلٹ کے حوالے سے منعقدہ جائزہ اجلاس کی صدارت کرتے ہوئے کہی۔ اجلاس میں ایڈیشنل ڈپٹی کمشنر جنرل شبیر احمد ڈوگر، اسسٹنٹ کمشنر لیہ زوہیب کریم، ڈپٹی کنزرویٹر فاریسٹ سجاد حیدر شاہ، سی او ضلع کونسل محمد فیصل اور دیگر متعلقہ افسران نے شرکت کی۔
ڈپٹی کمشنر نے ہدایت کی کہ گرین بیلٹ سے خود رو جھاڑیوں کی صفائی کے لیے خصوصی اقدامات کیے جائیں جبکہ پودوں اور گھاس کی آبیاری کے لیے جدید آبپاشی کے طریقوں کو بروئے کار لایا جائے۔
آصف علی ڈوگر نے کہا کہ لیہ چوک اعظم روڈ ضلع کی اہم شاہراہوں میں شامل ہے اور اسے شہر کا داخلی دروازہ بھی تصور کیا جاتا ہے۔ گرین بیلٹ کو خوبصورت، سرسبز اور مثالی بنا کر نہ صرف شہر کی خوبصورتی میں اضافہ کیا جائے گا بلکہ اسے لیہ کی نمایاں شناخت بھی بنایا جائے گا۔
