لیہ: ایڈیشنل ڈائریکٹر جنرل پنجاب محکمہ ماحولیات ڈاکٹر ظفر اقبال نے لیہ کا دورہ کیا، جہاں انہوں نے محکمہ ماحولیات کے افسران اور بھٹہ مالکان سے ملاقات کی اور سموگ کی روک تھام، ماحولیاتی آلودگی کے خاتمے اور اینٹوں کے بھٹوں کو ماحول دوست ٹیکنالوجی پر منتقل کرنے کے حوالے سے تفصیلی گفتگو کی۔
ڈاکٹر ظفر اقبال نے بھٹہ مالکان کو ہدایت کی کہ اینٹوں کے بھٹوں کو جلد از جلد زگ زیگ ٹیکنالوجی پر منتقل کیا جائے اور ماحولیاتی قوانین و ایس او پیز پر مکمل عملدرآمد یقینی بنایا جائے۔ انہوں نے کہا کہ زگ زیگ ٹیکنالوجی دھوئیں اور فضائی آلودگی میں کمی کے ساتھ ایندھن کی بچت اور اینٹوں کے معیار میں بہتری کے لیے بھی مؤثر ہے۔
انہوں نے بتایا کہ پنجاب حکومت کی جانب سے سموگ کے تدارک کے لیے قبل از سموگ ایکشن پلان 2026 کے تحت جولائی سے ستمبر تک مختلف شعبوں میں پیشگی اقدامات کیے جا رہے ہیں۔ فضائی آلودگی کے ذرائع کی نگرانی، صنعتی یونٹس اور اینٹوں کے بھٹوں کی انسپیکشن سمیت ماحولیاتی قوانین پر عملدرآمد یقینی بنایا جا رہا ہے۔
ایڈیشنل ڈائریکٹر جنرل نے کہا کہ پنجاب میں اینٹوں کے بھٹوں کے لیے زگ زیگ فائرنگ ٹیکنالوجی بنیادی ماحولیاتی تقاضوں میں شامل ہے۔ بھٹہ مالکان غیر معیاری ایندھن کے استعمال سے گریز کریں، دھوئیں کے مقررہ معیار کی پابندی کریں اور بھٹوں پر متعلقہ معلومات پر مشتمل سائن بورڈز آویزاں کریں۔
انہوں نے کہا کہ سموگ کسی ایک محکمے یا شعبے کا مسئلہ نہیں بلکہ اجتماعی ذمہ داری ہے۔ گاڑیوں کا دھواں، صنعتی اخراج، گردوغبار، فصلوں کی باقیات اور کچرے کو جلانا فضائی آلودگی میں اضافے کی اہم وجوہات ہیں، اس لیے شہریوں، کسانوں، صنعتکاروں، ٹرانسپورٹرز اور بھٹہ مالکان کو ماحولیاتی تحفظ کے لیے اپنا کردار ادا کرنا ہوگا۔
اس موقع پر صدر بھٹہ ایسوسی ایشن نور خان، حبیب اللہ خان، چوہدری شاہد اور دیگر بھٹہ مالکان نے محکمہ ماحولیات کے ساتھ مکمل تعاون اور ماحولیاتی قوانین و ایس او پیز پر عملدرآمد کے لیے کیے جانے والے اقدامات سے آگاہ کیا۔
