لیہ: ڈپٹی کمشنر لیہ آصف علی ڈوگر کی زیر صدارت عید میلاد النبی ﷺ کے انتظامات کا جائزہ لینے کے لیے کمیٹی روم میں اجلاس منعقد ہوا، جس میں ایڈیشنل ڈپٹی کمشنر جنرل شبیر احمد ڈوگر، متعلقہ محکموں کے افسران، صدر انجمن تاجران اظہر ہانس اور ممبر میلاد کمیٹی عطاء الرحمٰن نے شرکت کی۔
اجلاس میں عید میلاد النبی ﷺ کے سلسلے میں ضلع بھر میں کیے جانے والے انتظامات پر تفصیلی غور کیا گیا۔ ڈپٹی کمشنر آصف علی ڈوگر نے کہا کہ عید میلاد النبی ﷺ مذہبی عقیدت و احترام اور شایان شان طریقے سے منایا جائے گا۔ ضلع بھر میں سرکاری و نجی عمارتوں پر چراغاں کیا جائے گا جبکہ مختلف مقامات پر ٹھنڈی سبیلوں کا بھی انتظام کیا جائے گا۔
انہوں نے بتایا کہ عید میلاد النبی ﷺ کی مرکزی تقریب میلاد گراؤنڈ میں منعقد ہوگی۔ ڈپٹی کمشنر نے متعلقہ محکموں کو ہدایت کی کہ تمام ادارے باہمی تعاون، مؤثر رابطہ کاری اور مربوط حکمت عملی کے تحت اپنے فرائض انجام دیں تاکہ تقریبات کے دوران بہترین انتظامات یقینی بنائے جاسکیں۔
ڈپٹی کمشنر نے جلوسوں کے روٹس اور اہم مقامات پر صفائی ستھرائی کے خصوصی انتظامات کرنے کی ہدایت کرتے ہوئے کہا کہ پانی اور چونے کے چھڑکاؤ سمیت دیگر ضروری اقدامات بروقت مکمل کیے جائیں۔ شہریوں کو کسی قسم کی دشواری سے بچانے کے لیے صفائی، سیکیورٹی اور ٹریفک کے انتظامات بھی ہر صورت یقینی بنائے جائیں۔
اجلاس میں متعلقہ افسران نے اپنے اپنے محکموں کی جانب سے کیے جانے والے انتظامات سے متعلق بریفنگ دی اور عید میلاد النبی ﷺ کی تقریبات کو پرامن، منظم اور مثالی انداز میں منعقد کرنے کے عزم کا اظہار کیا۔
