لیہ: ڈپٹی کمشنر لیہ آصف علی ڈوگر کے احکامات پر ضلع بھر میں گاڑیوں میں غیر قانونی ایل پی جی ری فلنگ کے خلاف کارروائیاں جاری ہیں۔ اس سلسلے میں سول ڈیفنس آفیسر لیہ نے تھانہ سٹی کی حدود میں مختلف ایل پی جی ری فلنگ ورکشاپس کا معائنہ کیا۔
کارروائی کے دوران گاڑیوں میں غیر قانونی طور پر ایل پی جی ری فلنگ میں ملوث دو ورکشاپس کے خلاف قانونی کارروائی عمل میں لائی گئی۔ ایک ورکشاپ کو سیل کر دیا گیا جبکہ دوسری کے خلاف مقدمہ درج کرلیا گیا۔
مختلف مقامات پر کارروائی کے دوران ایل پی جی سلنڈرز، ری فلنگ مشین، کمپیوٹر اسکیل اور ری فلنگ پائپ بھی قبضے میں لے لیے گئے، جبکہ ضبط شدہ سامان مزید قانونی کارروائی کے لیے متعلقہ حکام کے حوالے کر دیا گیا۔
سول ڈیفنس آفیسر لیہ نے کہا کہ گاڑیوں میں غیر قانونی ایل پی جی ری فلنگ انسانی جانوں کے لیے انتہائی خطرناک ہے، اس لیے خلاف ورزی کرنے والوں کے خلاف بلاامتیاز کارروائی جاری رکھی جائے گی۔
انہوں نے کہا کہ ڈپٹی کمشنر لیہ آصف علی ڈوگر کی ہدایات پر غیر قانونی ایل پی جی ری فلنگ کے خلاف کریک ڈاؤن کو مزید مؤثر بنایا جائے گا اور شہریوں کی جان و مال کے تحفظ کے لیے حفاظتی قوانین پر سختی سے عملدرآمد یقینی بنایا جائے گا۔
