لیہ:ڈپٹی کمشنر لیہ آصف علی ڈوگر کی ہدایت پر شہریوں کو صاف پینے کے پانی کی فراہمی اور بنیادی سہولیات کی بہتری کے لیے اقدامات جاری ہیں۔ اس سلسلے میں اسسٹنٹ کمشنر چوک اعظم رانا زوہیب کریم نے واٹر فلٹریشن پلانٹ اور غلہ منڈی چوک اعظم کا تفصیلی دورہ کیا۔
اسسٹنٹ کمشنر نے فلٹریشن پلانٹ کی کارکردگی، صفائی ستھرائی اور شہریوں کو فراہم کیے جانے والے صاف پانی کی سہولت کا جائزہ لیا، جبکہ غلہ منڈی میں صفائی کے انتظامات، انتظامی امور اور دیگر بنیادی سہولیات کا بھی معائنہ کیا۔
انہوں نے متعلقہ افسران اور عملے کو ہدایت کی کہ واٹر فلٹریشن پلانٹ کو ہر وقت فعال رکھا جائے، صفائی ستھرائی کے انتظامات مزید بہتر بنائے جائیں اور شہریوں کو بنیادی سہولیات کی فراہمی میں کسی قسم کی غفلت نہ برتی جائے۔
رانا زوہیب کریم نے کہا کہ عوام کو صاف اور معیاری پینے کے پانی کی فراہمی ضلعی انتظامیہ کی ترجیحات میں شامل ہے۔ شہری سہولیات کی بہتری کے لیے فیلڈ میں باقاعدگی سے مانیٹرنگ کا عمل بھی جاری رکھا جائے گا۔
