لاہور:سابق اداکارہ نور بخاری نے سابق شوہر عون چوہدری سے دوبارہ شادی اور اپنی زندگی کے نشیب و فراز کے حوالے سے گفتگو کرتے ہوئے کہا ہے کہ عون چوہدری سے دوبارہ شادی کا انہوں نے کبھی منصوبہ نہیں بنایا تھا، یہ سب اللہ تعالیٰ کی طرف سے لکھی گئی تقدیر کا حصہ تھا۔
ایک انٹرویو میں نور بخاری نے بتایا کہ دونوں کے درمیان محبت تھی اور وقت کے ساتھ وہ دوبارہ ایک دوسرے کے قریب آگئے۔ ان کے مطابق ان کی ایک بیٹی بھی عون چوہدری سے ہے، جس نے دونوں کو دوبارہ قریب آنے میں اہم کردار ادا کیا۔
نور بخاری کا کہنا تھا کہ جب انہوں نے شوبز چھوڑنے کا فیصلہ کیا تو اللہ تعالیٰ نے عون چوہدری کے دل میں بھی یہ خیال ڈالا اور آج وہ چار بچوں کے ساتھ خوشگوار زندگی گزار رہی ہیں۔
اپنی زندگی کے تجربات کا ذکر کرتے ہوئے سابق اداکارہ نے کہا کہ انہوں نے چار طلاقوں سمیت زندگی میں کئی نشیب و فراز دیکھے، تاہم ان تجربات سے انہیں یہ سیکھنے کو ملا کہ اللہ تعالیٰ ہی وہ ذات ہے جو انسان کے ساتھ ہمیشہ رہتی ہے اور اسے کبھی تنہا نہیں چھوڑتی۔
نور بخاری نے کہا کہ وہ ماضی میں نہیں دیکھتیں بلکہ ہمیشہ زندگی میں آگے بڑھنے پر توجہ دیتی ہیں۔ بیٹیوں کی ماؤں کی دوسری شادی کے حوالے سے انہوں نے اپنی رائے کا اظہار کرتے ہوئے کہا کہ اسلام دوسری شادی کی اجازت دیتا ہے، تاہم ایسے معاملات میں بچوں کے مستقبل اور جذبات کو بھی مدنظر رکھنا چاہیے۔
نور بخاری کے ان بیانات پر سوشل میڈیا صارفین کی جانب سے مختلف ردعمل سامنے آیا ہے۔
