جشن عید میلاد النبی ﷺ: ضلعی انتظامیہ فول پروف سیکیورٹی، صفائی اور بنیادی سہولیات یقینی بنائے، مفتی نعمان قادرمصطفائی

لیہ:تحریک اصلاح محافل نعت انٹرنیشنل کے بانی و مرکزی امیر اور مرکز منہاج الرسول لیہ کے سربراہ صاحبزادہ مفتی نعمان قادر مصطفائی نے ڈپٹی کمشنر لیہ آصف علی ڈوگر سے مطالبہ کیا ہے کہ ماہِ ربیع الاول میں جشن عید میلاد النبی ﷺ کی تقریبات اور مرکزی جلوس کے لیے بہترین انتظامات یقینی بنائے جائیں۔مفتی نعمان قادر مصطفائی نے اپنے مطالبات میں کہا کہ میلاد گراؤنڈ میں مرکزی محفل کے موقع پر ٹھنڈے پانی کی سبیل اور وافر سیکیورٹی کا انتظام کیا جائے، جبکہ مرکزی جلوس کے راستوں پر شرکاء کے لیے ٹھنڈے پانی کے چھڑکاؤ اور مختلف مقامات پر شربت و شکنجبین کی سبیلوں کا اہتمام کیا جائے۔انہوں نے مطالبہ کیا کہ مرکزی جلوس کے ساتھ ریسکیو 1122 کی ایمبولینسز اور ضروری سرکاری انتظامات موجود رہیں، جلوس کو فول پروف سیکیورٹی اور مکمل انتظامی تعاون فراہم کیا جائے اور نظم و ضبط برقرار رکھنے کے لیے مؤثر اقدامات کیے جائیں۔انہوں نے کہا کہ ربیع الاول کے دوران گلی محلوں، مساجد اور بازاروں میں صفائی ستھرائی کا خصوصی انتظام کیا جائے، تمام مسالک کی مساجد کے اطراف صفائی اور سفید چونے کا انتظام کیا جائے جبکہ مرکزی مساجد اور اہم چوکوں پر خوبصورت لائٹنگ بھی کی جائے۔مفتی نعمان قادر نے مزید مطالبہ کیا کہ دکانوں اور بازاروں کو سجانے کے لیے خصوصی اقدامات کیے جائیں اور بہترین سجاوٹ کرنے والوں کو سرکاری سطح پر انعامات سے نوازا جائے۔انہوں نے ضلعی انتظامیہ سے یہ بھی مطالبہ کیا کہ عید میلاد النبی ﷺ کے روز مختلف اسٹالز پر گانے بجانے کی روک تھام اور انتظامی نظم و ضبط کے لیے مناسب احکامات جاری کیے جائیں۔مفتی نعمان قادر مصطفائی نے امید ظاہر کی کہ ڈپٹی کمشنر لیہ آصف علی ڈوگر ربیع الاول کے مقدس مہینے کے حوالے سے پیش کیے گئے ان مطالبات اور تجاویز پر خصوصی توجہ دیتے ہوئے بہترین انتظامات یقینی بنائیں گے۔