لیہ:پٹرولنگ پولیس ضلع لیہ کی اگست 2026 کی 15 روزہ کارکردگی، جرائم کے خلاف مؤثر کارروائیاں،ڈی ایس پی پٹرولنگ ضلع لیہ راؤ عمر فاروق نے رواں ماہ اگست 2026 کی 15 روزہ کارکردگی کے حوالے سے آگاہ کرتے ہوئے بتایا کہ پٹرولنگ پولیس ضلع لیہ عوام کے جان و مال کے تحفظ، جرائم کے خاتمے اور شاہرات پر ٹریفک کے محفوظ و رواں نظام کے قیام کے لیے مؤثر اور بھرپور اقدامات کر رہی ہے۔انہوں نے بتایا کہ اگست 2026 کے دوران اوورلوڈنگ، اوور اسپیڈنگ، اسلحہ، منشیات اور دیگر جرائم کے خلاف کارروائی کرتے ہوئے مجموعی طور پر 15 مقدمات درج کیے گئے، جبکہ ٹریفک قوانین کی خلاف ورزی پر 2600 ڈرائیوران کے چالان کیے گئے۔ ضلع لیہ میں قائم 08 پٹرولنگ پوسٹس کے ذریعے دورانِ سفر 22 شہریوں کو مختلف نوعیت کی مدد فراہم کی گئی۔ جدید ای-ایپ کے ذریعے چیکنگ کے دوران 02 اشتہاری و عدالتی مفرور ملزمان کو گرفتار کیا گیا، جبکہ 37 بغیر رجسٹریشن اور بغیر قانونی دستاویزات موٹرسائیکلیں قبضے میں لے کر متعلقہ تھانوں میں بند کی گئیں۔ضلع بھر میں 20 عارضی و مستقل تجاوزات کا خاتمہ کیا گیا، جس کے مثبت نتائج سامنے آئے ہیں۔راؤ عمر فاروق نے کہا کہ ٹریفک قوانین، وہیکلز رجسٹریشن اور روڈ یوزرز سے متعلق نئے قواعد و ضوابط پر سختی سے عملدرآمد یقینی بنایا جا رہا ہے۔ بغیر لائسنس ڈرائیونگ، اوورلوڈنگ اور اوور اسپیڈنگ کے خلاف زیرو ٹالرنس پالیسی کے تحت بلاامتیاز کارروائیاں جاری ہیں اور قانون کی خلاف ورزی کرنے والوں کے ساتھ کسی قسم کی رعایت نہیں برتی جائے گی۔انہوں نے تمام پبلک ٹرانسپورٹ گاڑیوں کے اندر سکرین اور ہر سیٹ کے پیچھے QR پینک بٹن کا کوڈ لازماً چسپاں کروانے کی ہدایت دیتے ہوئے کہا کہ کسی بھی ہنگامی صورتحال، ڈرائیور کی خطرناک ڈرائیونگ، اوور اسپیڈنگ، اوورچارجنگ یا دیگر شکایات کی صورت میں مسافر فوری طور پر QR پینک بٹن استعمال کرکے متعلقہ اداروں کو اطلاع دے سکتے ہیں، تاکہ بروقت کارروائی ممکن بنائی جا سکے۔ڈی ایس پی پٹرولنگ راؤ عمر فاروق نے کہا کہ پٹرولنگ پولیس کے افسران و جوان عوام الناس کی خدمت اور حفاظت کو اپنی اولین ذمہ داری سمجھتے ہوئے دن رات فرائض سرانجام دے رہے ہیں۔ ضلع لیہ میں امن و سلامتی کے قیام، ٹریفک قوانین پر عملدرآمد اور شہریوں کے محفوظ سفر کو یقینی بنانے کے لیے تمام ممکنہ اقدامات آئندہ بھی جاری رکھے جائیں گے۔
