لیہ: ڈسٹرکٹ ایجوکیشن آفیسر مردانہ گل شیر نے گورنمنٹ ماڈل ہائر سیکنڈری سکول لیہ میں پیما سکولز کے اساتذہ کی جاری تربیتی ورکشاپ کا معائنہ کیا اور تربیتی سرگرمیوں کا جائزہ لیا۔اس موقع پر تربیتی ورکشاپ سے خطاب کرتے ہوئے ڈی ای او مردانہ گل شیر نے کہا کہ اساتذہ کی پیشہ ورانہ تربیت کا مقصد تدریسی نظام کو جدید اور مؤثر بنانا اور اساتذہ کو جدید تدریسی طریقوں، کلاس روم مینجمنٹ اور بچوں کی نفسیات کے مطابق تدریس کی مہارتوں سے آراستہ کرنا ہے۔انہوں نے کہا کہ جدید تدریسی طریقوں کے استعمال سے رٹا سسٹم کے بجائے عملی سرگرمیوں اور تصوراتی تدریس کو فروغ ملتا ہے، جس سے بچوں میں سوچنے، سمجھنے اور مسائل حل کرنے کی صلاحیت بہتر ہوتی ہے اور تعلیمی کارکردگی میں نمایاں بہتری آتی ہے۔گل شیر نے کہا کہ تربیت یافتہ اساتذہ ریاضی، سائنس اور انگریزی جیسے مشکل مضامین کو آسان اور مؤثر انداز میں پڑھانے کے قابل ہوتے ہیں، جبکہ کلاس روم کے ماحول کو دوستانہ اور پرکشش بنانے سے طلبہ کی تعلیمی سرگرمیوں میں دلچسپی بھی بڑھتی ہے۔انہوں نے مزید کہا کہ تربیتی ورکشاپ کے دوران اساتذہ کو ہر بچے کی انفرادی صلاحیت اور کمزوری کو سمجھتے ہوئے مؤثر رہنمائی کے طریقے بھی سکھائے جا رہے ہیں۔ اساتذہ کی پیشہ ورانہ تربیت نہ صرف ان کی تدریسی صلاحیتوں کو نکھارتی ہے بلکہ بچوں کو معیاری تعلیم کی فراہمی اور ان کے روشن مستقبل کی بنیاد مضبوط کرنے میں بھی اہم کردار ادا کرتی ہے۔تربیتی ورکشاپ میں ایک سو سے زائد اساتذہ شریک ہوئے۔
