لیہ: ڈائریکٹر جنرل پنجاب فوڈ اتھارٹی کی خصوصی ہدایت پر پنجاب فوڈ اتھارٹی کی فوڈ سیفٹی ٹیم نے فتح پور کے چک نمبر 106 ایم ایل میں غیر قانونی سلاٹر ہاؤس کے خلاف کارروائی کرتے ہوئے 485 کلو گرام مضرِ صحت اور غیر معیاری گوشت برآمد کر کے تلف کر دیا، جبکہ کارروائی کے دوران ایک قصاب صفدر حسین کا ملازم ملزم عبدالستار کو گرفتار کر کے مقدمہ درج کر لیا گیاجبکہ صفدر حسین موقع سے فرار ہونے میں کامیاب ہوگیا ۔ایف آئی آر کے مطابق پنجاب فوڈ اتھارٹی کی ٹیم نے اطلاع ملنے پر غیر قانونی سلاٹر ہاؤس پر چھاپہ مارا، جہاں بھاری مقدار میں ایسا گوشت محفوظ کیا گیا تھا جو رنگ تبدیل ہونے اور خراب حالت کے باعث انسانی استعمال کے لیے انتہائی غیر موزوں تھا۔سرکاری لائیو اسٹاک ویٹرنری ڈاکٹر کی رپورٹ کے مطابق برآمد شدہ بیف انتہائی غیر صحت بخش اور خراب حالت میں تھا، جسے انسانی استعمال کے لیے مضر قرار دیا گیا۔ پنجاب فوڈ اتھارٹی کی ٹیم نے موقع پر کارروائی کرتے ہوئے 485 کلو گرام گوشت تلف کر دیا۔کارروائی کے دوران گوشت کے نمونے، موقع کی ویڈیوز اور دیگر شواہد بھی محفوظ کیے گئے، جبکہ غیر قانونی سلاٹر ہاؤس کے خلاف پنجاب فوڈ اتھارٹی ایکٹ 2011 کی متعلقہ دفعات کے تحت مقدمہ درج کر لیا گیا۔پنجاب فوڈ اتھارٹی حکام کا کہنا ہے کہ شہریوں کو معیاری اور محفوظ خوراک کی فراہمی یقینی بنانے کے لیے ملاوٹ، غیر معیاری اور مضرِ صحت اشیائے خورونوش کے خلاف کارروائیاں جاری رہیں گی۔
