لیہ: ڈپٹی کمشنر لیہ آصف علی ڈوگر نے یونیورسٹی آف لیہ میں 80 کے وی اے سولر سسٹم کا افتتاح کر دیا۔ اس موقع پر وائس چانسلر یونیورسٹی آف لیہ پروفیسر ڈاکٹر محمد زبیر ابوبکر سمیت دیگر متعلقہ افسران اور فیکلٹی ممبران بھی موجود تھے۔
اس موقع پر ڈپٹی کمشنر آصف علی ڈوگر نے کہا کہ حکومت پنجاب اعلیٰ تعلیم کے فروغ اور طلبہ و طالبات کو جدید تعلیمی و تحقیقی سہولیات کی فراہمی کے لیے مؤثر اقدامات اٹھا رہی ہے۔ یونیورسٹی آف لیہ میں بھی طلبہ کی تعلیمی ضروریات کو مدنظر رکھتے ہوئے معیاری تعلیمی پروگرامز جاری ہیں۔
انہوں نے کہا کہ 80 کے وی اے سولر سسٹم کی تنصیب کا مقصد یونیورسٹی میں توانائی کی بلا تعطل فراہمی کو یقینی بنانا اور بجلی کے اخراجات میں کمی لانا ہے۔ سولر سسٹم سے یونیورسٹی کی بجلی کی ضروریات پوری کرنے میں مدد ملے گی اور تعلیمی و تحقیقی سرگرمیاں بلا تعطل جاری رکھنے میں سہولت حاصل ہوگی۔
اس موقع پر یونیورسٹی انتظامیہ کی جانب سے جاری تعلیمی، تحقیقی اور توانائی سے متعلق اقدامات پر ڈپٹی کمشنر آصف علی ڈوگر کو بریفنگ بھی دی گئی۔
بعد ازاں ڈپٹی کمشنر نے کمپیوٹر سائنس بلاک کا دورہ کیا اور وہاں قائم مختلف لیبارٹریز کا معائنہ کیا۔ انہوں نے یونیورسٹی میں طلبہ کو فراہم کی جانے والی تعلیمی و تحقیقی سہولیات کا جائزہ بھی لیا۔
