لیہ: انٹرنیشنل یوتھ ڈے 2026 کے موقع پر ریسکیو 1122 ضلع لیہ کے زیر اہتمام آگاہی ریلی کا انعقاد کیا گیا، جس میں ضلع لیہ کی تینوں تحصیلوں لیہ، کروڑ لعل عیسن اور چوبارہ سے تعلق رکھنے والے ریسکیو سکاوٹس نے بھرپور شرکت کی۔ ریلی کے شرکاء نے ہاتھوں میں مختلف آگاہی پیغامات پر مشتمل پینافلیکس اٹھا رکھے تھے۔ریلی کا مقصد نوجوانوں میں مثبت سوچ، ذمہ داری، خدمت خلق اور محفوظ معاشرے کے فروغ کے حوالے سے شعور اجاگر کرنا تھا۔ اس موقع پر ڈسٹرکٹ ایمرجنسی آفیسر ریسکیو 1122 ضلع لیہ ڈاکٹر سجاد احمد ملک نے ریسکیو سکاوٹس سے خطاب کرتے ہوئے کہا کہ نوجوان کسی بھی قوم کا قیمتی اثاثہ اور مستقبل کے معمار ہوتے ہیں۔ نوجوانوں کی مثبت توانائی اور صلاحیتوں کو تعمیری سرگرمیوں میں بروئے کار لا کر معاشرے میں نمایاں بہتری لائی جا سکتی ہے۔انہوں نے کہا کہ ریسکیو سکاوٹس پروگرام نوجوانوں میں ایمرجنسی سے نمٹنے، ابتدائی طبی امداد، روڈ سیفٹی، آگ سے بچاؤ اور قدرتی آفات کے دوران حفاظتی اقدامات کے حوالے سے عملی شعور پیدا کرنے میں اہم کردار ادا کر رہا ہے۔ تربیت یافتہ نوجوان کسی بھی ہنگامی صورتحال میں ابتدائی سطح پر مؤثر مدد فراہم کرنے کے ساتھ ساتھ دوسروں کو بھی حفاظتی اقدامات اختیار کرنے کی ترغیب دے سکتے ہیں۔ڈسٹرکٹ ایمرجنسی آفیسر نے ریسکیو سکاوٹس پر زور دیا کہ وہ تعلیم کے ساتھ معاشرتی ذمہ داریوں کو بھی ترجیح دیں اور خدمت خلق، نظم و ضبط اور انسانی جانوں کے تحفظ کے جذبے کو فروغ دیں۔
ریسکیو 1122 ضلع لیہ کی جانب سے انٹرنیشنل یوتھ ڈے کے موقع پر نوجوانوں کو معاشرے میں مثبت تبدیلی، ذمہ دارانہ طرز عمل اور انسانی خدمت کے لیے اپنا مؤثر کردار ادا کرنے کا پیغام دیا گیا۔
