لیہ: ایڈیشنل ڈپٹی کمشنر میونسپل سروسز/منیجنگ ڈائریکٹر ستھرا پنجاب شبیر احمد ڈوگر نے پانچ مرلہ سکیم میں صفائی ستھرائی کے انتظامات کا معائنہ کیا۔ انہوں نے مختلف مقامات پر صفائی کی صورتحال، کوڑا کرکٹ کی تلفی اور ستھرا پنجاب ٹیموں کی جانب سے جاری صفائی آپریشن کا جائزہ لیا۔
اس موقع پر ایڈیشنل ڈپٹی کمشنر شبیر احمد ڈوگر نے متعلقہ عملے کو ہدایت کی کہ شہری علاقوں میں صفائی کے معیار کو مزید بہتر بنایا جائے، کوڑا کرکٹ کی بروقت منتقلی یقینی بنائی جائے اور صفائی کے عمل میں کسی قسم کی غفلت نہ برتی جائے۔
انہوں نے کہا کہ صاف ستھرا ماحول شہریوں کا بنیادی حق ہے اور ستھرا پنجاب پروگرام کے تحت صفائی کے نظام کو مؤثر بنانا انتظامیہ کی اولین ترجیحات میں شامل ہے۔
اے ڈی سی شبیر احمد ڈوگر نے شہریوں سے بھی اپیل کی کہ وہ صفائی کے نظام کو بہتر بنانے کے لیے انتظامیہ اور ستھرا پنجاب کی ٹیموں کے ساتھ بھرپور تعاون کریں اور کوڑا کرکٹ مقررہ مقامات پر ڈالیں۔ اس موقع پر ڈسٹرکٹ منیجر محمد ندیم عابد بھی ان کے ہمراہ تھے۔
