لیہ، 11 اگست 2026: ڈپٹی کمشنر لیہ آصف علی ڈوگر کی ہدایت پر ضلع بھر میں سڑکوں کی تعمیر و مرمت کا کام تیز کر دیا گیا ہے، جبکہ سڑکوں کے تحفظ اور دیکھ بھال کے لیے قائم کسٹوڈین آف روڈ کمیٹی نے بھی عملی اقدامات شروع کر دیے ہیں۔
اس سلسلہ میں رفیق آباد کے مقام پر چوبارہ روڈ کی تعمیر و مرمت کا کام مکمل کر لیا گیا ہے۔ ضلع کونسل لیہ کے زیر اہتمام مذکورہ سڑک پر رجڈ پیومنٹ کی تعمیر کا کام بھی مکمل کر لیا گیا ہے۔
ڈپٹی کمشنر آصف علی ڈوگر کی ہدایت پر چیف آفیسر ضلع کونسل محمد فیصل نے تعمیراتی کام کا موقع پر معائنہ کیا اور سڑک کی تعمیر میں استعمال ہونے والے میٹریل اور کام کے مجموعی معیار کا جائزہ لیا۔
اس موقع پر چیف آفیسر ضلع کونسل نے متعلقہ عملے کو ہدایت کی کہ تعمیراتی کام میں معیار پر کسی قسم کا سمجھوتہ نہ کیا جائے اور سڑکوں کی دیکھ بھال کو بھی یقینی بنایا جائے۔
ڈپٹی کمشنر آصف علی ڈوگر نے ہدایت کی ہے کہ ضلع بھر میں سڑکوں کا سروے مسلسل جاری رکھا جائے اور جہاں سڑکیں خستہ حالی کا شکار ہیں وہاں بحالی، تعمیر و مرمت کے لیے فوری اقدامات کیے جائیں۔
انہوں نے کہا کہ سڑکوں کی بروقت مرمت سے نہ صرف شہریوں کو سفری مشکلات سے نجات ملے گی بلکہ ٹریفک حادثات کے امکانات میں بھی کمی لائی جا سکے گی۔
