لاہور: پنجاب ریونیو اتھارٹی نے صوبے میں کچی رسیدوں کے اجراء پر پابندی عائد کرتے ہوئے تمام ہوٹلز، ریسٹورنٹس، کافی شاپس اور میرج ہالز میں الیکٹرانک انوائس مانیٹرنگ سسٹم (EIMS) کا نفاذ لازمی قرار دے دیا۔
پنجاب ریونیو اتھارٹی کی جانب سے اس حوالے سے نوٹیفکیشن بھی جاری کردیا گیا ہے۔ ترجمان کے مطابق متعلقہ کاروباری مراکز کو EIMS کے تحت صارفین کو باقاعدہ الیکٹرانک رسید جاری کرنا ہوگی۔
ترجمان پنجاب ریونیو اتھارٹی کا کہنا ہے کہ EIMS کے تحت رسید جاری نہ کرنے یا قوانین کی خلاف ورزی کرنے والوں کے خلاف سخت کارروائی کی جائے گی اور انہیں 4 لاکھ سے 10 لاکھ روپے تک جرمانہ عائد کیا جاسکتا ہے۔
ترجمان کے مطابق قوانین کی مسلسل خلاف ورزی کرنے والے کاروباری مراکز کو ایک ماہ تک سیل بھی کیا جاسکتا ہے۔ پنجاب ریونیو اتھارٹی نے کاروباری اداروں پر زور دیا ہے کہ وہ مقررہ قوانین پر عملدرآمد یقینی بنائیں تاکہ قانونی کارروائی سے بچا جاسکے۔
