اسلام آباد: گڈز ٹرانسپورٹرز اور حکومت کے درمیان مذاکرات کا چوتھا دور آج اسلام آباد میں ہوگا، جس میں وزیر مواصلات اور وزیر پٹرولیم ٹرانسپورٹرز کے نمائندوں سے مذاکرات کریں گے۔
حکومت اور گڈز ٹرانسپورٹرز کے درمیان مذاکرات کے پہلے تین ادوار بے نتیجہ رہے تھے۔ آج ہونے والے مذاکرات میں پٹرول اور ڈیزل کی قیمتوں میں روزانہ ردوبدل کی پالیسی پر نظرثانی سمیت ٹرانسپورٹرز کے دیگر مطالبات پر غور کیے جانے کا امکان ہے۔
ذرائع کے مطابق موٹرویز پر ٹول ٹیکس اور بھاری جرمانوں میں کمی کے معاملے پر بھی بات چیت متوقع ہے۔ ٹرانسپورٹرز کی جانب سے مطالبات کی منظوری کے لیے حکومت پر دباؤ بڑھایا جا رہا ہے۔
ملک بھر میں گڈز ٹرانسپورٹرز کی ہڑتال آج چوتھے روز میں داخل ہوگئی ہے، جس کے باعث مال برداری اور سپلائی کے نظام پر اثرات مرتب ہو رہے ہیں۔
مذاکرات کامیاب ہونے کی صورت میں وفاقی وزرا اور گڈز ٹرانسپورٹرز کے نمائندگان مشترکہ پریس کانفرنس میں پیش رفت سے آگاہ کریں گے۔
