کوٹ ادو: باراتیوں سے بھرا لوڈر رکشہ بے قابو ہوکر مظفرگڑھ کینال میں جاگرا، حادثے کے نتیجے میں تین افراد جاں بحق ہوگئے جبکہ 11 افراد کو ریسکیو کرلیا گیا۔ لاپتہ افراد کی تلاش کے لیے ریسکیو آپریشن جاری ہے۔
ڈی پی او کوٹ ادو منصور قمر کے مطابق رکشے میں سوار افراد ایک ہی خاندان سے تعلق رکھتے تھے اور شادی کی تقریب میں شرکت کے لیے جا رہے تھے۔ حادثہ کچے راستے پر پیش آیا جہاں اوور لوڈڈ رکشہ بے قابو ہوکر کینال میں جاگرا۔
پولیس کے مطابق اہل خانہ نے بتایا کہ رکشے میں خواتین اور بچوں سمیت مجموعی طور پر 26 افراد سوار تھے۔ حادثے کے بعد متعدد افراد لاپتہ ہوگئے، جن کی تلاش کے لیے ریسکیو اہلکاروں کی جانب سے سرچ آپریشن جاری ہے۔
ریسکیو ٹیموں نے کینال سے اب تک تین افراد کی لاشیں نکال لی ہیں جبکہ 11 افراد کو بحفاظت باہر نکال لیا گیا۔ مزید لاپتہ افراد کی تلاش کے لیے امدادی سرگرمیاں جاری ہیں۔
