اسلام آباد: پاکستان پیپلز پارٹی نے حالیہ سیاسی کشیدگی کے تناظر میں قومی اسمبلی میں حکومت کے ساتھ پارلیمانی تعاون عارضی طور پر معطل کرنے کا فیصلہ کرلیا۔
پیپلز پارٹی کے ذرائع کے مطابق پارٹی کے ارکان قومی اسمبلی میں حکومتی بنچوں پر ہی بیٹھیں گے، تاہم 74 ارکان پر مشتمل پیپلز پارٹی کا پارلیمانی گروپ آئندہ فیصلے تک پارلیمانی امور، قانون سازی، کورم اور دیگر متعلقہ کارروائیوں میں حکومت کے معاون کا کردار ادا نہیں کرے گا۔
ذرائع کا کہنا ہے کہ پیپلز پارٹی کا یہ فیصلہ حکومت اور پارٹی کے درمیان حالیہ کشیدگی کے بعد سامنے آیا ہے۔ پارٹی ارکان حکومتی بنچوں پر موجود رہیں گے، تاہم حکومتی معاملات میں پارلیمانی تعاون سے دستبردار رہنے کا فیصلہ کیا گیا ہے۔
پیپلز پارٹی کے اس فیصلے سے قومی اسمبلی میں حکومت کو قانون سازی اور کورم کے معاملات میں پارلیمانی مشکلات کا سامنا کرنا پڑ سکتا ہے۔
