اسلام آباد: صدرِ مملکت آصف علی زرداری نے لاہور، سندھ، پشاور، اسلام آباد اور بلوچستان ہائیکورٹس میں ایڈیشنل ججز کی تقرری اور بعض ایڈیشنل ججز کی توثیق کی منظوری دے دی۔
ایوانِ صدر کے اعلامیے کے مطابق صدرِ مملکت نے مختلف ہائیکورٹس میں ایڈیشنل ججز کی تقرری سے متعلق سمریوں کی منظوری دی ہے۔ اس اقدام کے بعد متعلقہ ہائیکورٹس میں ججز کی تعیناتی کا عمل آگے بڑھ سکے گا۔
اعلامیے کے مطابق صدرِ مملکت نے سپریم کورٹ کے ججز کی تنخواہوں، الاؤنسز اور پنشن کو وفاقی آئینی عدالت کے ججز کے مساوی کرنے کی بھی منظوری دے دی ہے۔
اس کے علاوہ ہائیکورٹ ججز کے رخصت، پنشن اور مراعات سے متعلق 1997ء کے حکم میں ترامیم کی بھی منظوری دی گئی ہے۔
ایوانِ صدر کے مطابق صدر آصف علی زرداری نے ہارون اختر کو وزیراعظم کا مشیر برائے صنعت و پیداوار مقرر کرنے کی بھی منظوری دے دی ہے۔
