اسلام آباد: وفاقی وزیر مذہبی امور سردار محمد یوسف نے حج 2027 کے حوالے سے اہم تفصیلات کا اعلان کرتے ہوئے سرکاری حج اسکیم کے تحت 40 روزہ حج پیکیج کی قیمت 12 لاکھ روپے مقرر کرنے کا بتایا ہے۔
اسلام آباد میں پریس کانفرنس کرتے ہوئے وفاقی وزیر مذہبی امور نے حج 2027 کے لیے درخواستوں اور حج اخراجات کی وصولی سے متعلق شیڈول سے آگاہ کیا۔ وزارت مذہبی امور کے مطابق سرکاری حج اسکیم کے تحت 40 روزہ حج پیکیج کے ممکنہ اخراجات 12 لاکھ روپے ہوں گے۔
وفاقی وزیر کے مطابق حج 2027 کے لیے پاکستان کا مجموعی حج کوٹہ 179,210 عازمین پر مشتمل ہوگا، جس میں 60 فیصد کوٹہ سرکاری جبکہ 40 فیصد نجی حج اسکیم کے لیے مختص کیا جائے گا۔
حج درخواستوں اور اخراجات کی وصولی کے شیڈول کے اعلان کے بعد عازمین حج کے لیے آئندہ مراحل بھی واضح ہوگئے ہیں۔ وزارت مذہبی امور کی جانب سے حج آپریشن سے متعلق دیگر انتظامات اور تفصیلات بھی مرحلہ وار جاری کی جائیں گی۔
