لاہور: پاکستان تحریک انصاف نے 14 اگست کو مینارِ پاکستان پر جلسے کے انعقاد کے لیے ضلعی انتظامیہ سے باضابطہ اجازت طلب کرلی۔ اس سلسلے میں پی ٹی آئی کی جانب سے ڈپٹی کمشنر لاہور کو درخواست جمع کرا دی گئی ہے۔
درخواست صدر لاہور پی ٹی آئی میاں اکرم عثمان کی جانب سے جمع کرائی گئی، جس میں 14 اگست کو شام 4 بج کر 30 منٹ سے رات 12 بج کر 30 منٹ تک جلسے کے انعقاد کی اجازت مانگی گئی ہے۔
ذرائع کے مطابق ڈپٹی کمشنر لاہور نے درخواست پر پیش رفت اور جلسے سے متعلق امور پر غور کے لیے پی ٹی آئی کے نمائندوں کو 11 اگست کو طلب کرلیا ہے۔ اس حوالے سے ضلعی انتظامیہ کی جانب سے اہم اجلاس بھی طلب کیا گیا ہے، جس میں جلسے کی اجازت، سکیورٹی اور دیگر انتظامی معاملات کا جائزہ لیا جائے گا۔
پی ٹی آئی رہنماؤں اور کارکنوں کی جانب سے 14 اگست کے موقع پر مینارِ پاکستان پر جلسے کی اجازت کے حوالے سے انتظامیہ کے فیصلے کا انتظار کیا جا رہا ہے۔
