لیہ: ڈپٹی کمشنر لیہ آصف علی ڈوگر کے احکامات پر ضلع بھر میں گاڑیوں میں غیر قانونی ایل پی جی ری فلنگ کے خلاف کارروائیاں جاری ہیں۔ سول ڈیفنس لیہ اور پیرا فورس نے مشترکہ کارروائی کرتے ہوئے تھانہ چوک اعظم کی حدود میں ایل پی جی ری فلنگ ورکشاپس کا معائنہ کیا۔کارروائی کے دوران دو ورکشاپس میں گاڑیوں میں غیر قانونی ایل پی جی ری فلنگ کا انکشاف ہوا، جس پر کارروائی کرتے ہوئے دو ہائی لکس ڈالے ایل پی جی سلنڈرز سمیت تحویل میں لے کر پیرا فورس کے حوالے کر دیے گئے۔ کارروائی کے دوران 45 کلوگرام کے 50 خالی سلنڈرز، 5 کلوگرام کا ایک سلنڈر اور ایک ری فلنگ جنریٹر بھی قبضے میں لے لیا گیا۔سول ڈیفنس آفیسر توقیر عباس اور پیرا فورس کی ٹیم نے موقع پر قانونی کارروائی عمل میں لاتے ہوئے غیر قانونی ایل پی جی ری فلنگ میں ملوث عناصر کے خلاف اقدامات کیے۔سول ڈیفنس آفیسر توقیر عباس نے کہا کہ گاڑیوں میں غیر قانونی ایل پی جی ری فلنگ انسانی جانوں کے لیے انتہائی خطرناک ہے اور کسی صورت برداشت نہیں کی جائے گی۔ انہوں نے کہا کہ ڈپٹی کمشنر آصف علی ڈوگر کی ہدایات پر غیر قانونی ایل پی جی ری فلنگ کے خلاف کریک ڈاؤن مزید مؤثر انداز میں جاری رکھا جائے گا۔
