لیہ میں سڑکوں کی حفاظت کے لیے ’’کسٹوڈین آف روڈز‘‘ کمیٹی قائم، تجاوزات اور غیر ضروری کھدائی کے خلاف کارروائی کا فیصلہ

لیہ: ڈپٹی کمشنر آصف علی ڈوگر نے ضلع بھر میں سرکاری سڑکوں کو ٹوٹ پھوٹ سے محفوظ رکھنے، تجاوزات، غیر ضروری کھدائی اور سڑکوں پر پانی کھڑا ہونے کی روک تھام کے لیے ’’کسٹوڈین آف روڈز‘‘ کمیٹی قائم کرنے کی ہدایت کردی۔
اس سلسلے میں ڈپٹی کمشنر آصف علی ڈوگر کی زیر صدارت سڑکوں کی حفاظت، دیکھ بھال اور پائیداری کے حوالے سے اجلاس منعقد ہوا، جس میں ایڈیشنل ڈپٹی کمشنر میونسپل سروسز شبیر احمد ڈوگر، اسسٹنٹ کمشنر زوہیب کریم، ایس ڈی ای او پیرا ام حبیبہ قریشی، سی ای او تعلیم ڈاکٹر عبدالقیوم، ڈی ایس او امتیاز احمد بھٹی، سی اوز میونسپل کمیٹیز و ضلع کونسل، محکمہ ہائی ویز کے سب انجینئرز، واسا حکام اور دیگر متعلقہ افسران نے شرکت کی۔
اجلاس میں ضلع کی مختلف سڑکوں کی موجودہ صورتحال، نکاسی آب، تجاوزات، سڑکوں پر پانی کھڑا ہونے، بلڈنگ میٹریل رکھنے، غیر ضروری کھدائی اور دیگر ایسے عوامل کا تفصیلی جائزہ لیا گیا جو سرکاری سڑکوں کو نقصان پہنچانے کا باعث بنتے ہیں۔
ڈپٹی کمشنر آصف علی ڈوگر نے کہا کہ سڑکیں قومی اثاثہ ہیں، جن کی تعمیر و مرمت پر سرکاری وسائل خرچ ہوتے ہیں، اس لیے ان کی حفاظت اور مناسب دیکھ بھال تمام متعلقہ اداروں کی مشترکہ ذمہ داری ہے۔ انہوں نے ہدایت کی کہ سڑکوں پر گڑھوں، کناروں کی ٹوٹ پھوٹ اور دیگر خرابیوں کی فوری نشاندہی کرکے بروقت مرمت اور تدارک کے اقدامات کیے جائیں۔
انہوں نے کہا کہ بارش کے بعد سڑکوں اور ان کے اطراف پانی کھڑا نہ ہونے دیا جائے اور جہاں پانی جمع ہو وہاں فوری نکاسی آب کا انتظام کیا جائے تاکہ سڑکوں کی بنیاد اور اطراف کو نقصان سے محفوظ رکھا جا سکے۔ سڑکوں کے اطراف بلڈنگ میٹریل، مٹی، بجری، ریت یا دیگر سامان رکھنے کی بھی اجازت نہیں دی جائے گی۔
ڈپٹی کمشنر نے واضح کیا کہ دکانوں اور کاروباری مراکز سے نکلنے والا پانی سڑکوں پر پھینکنے، سڑکوں پر گاڑیاں دھونے، غیر ضروری کھدائی کرنے یا کسی بھی ایسے اقدام کی اجازت نہیں دی جائے گی جس سے سرکاری سڑکوں کو نقصان پہنچے۔ خلاف ورزی کرنے والوں کے خلاف قانون کے مطابق جرمانے اور دیگر کارروائی عمل میں لائی جائے گی۔
انہوں نے سڑکوں کی مستقل نگرانی کے لیے ’’کسٹوڈین آف روڈز‘‘ کمیٹی تشکیل دینے کی ہدایت کرتے ہوئے کہا کہ کمیٹی میں اسسٹنٹ کمشنر، پیرا فورس، محکمہ ہائی ویز کے سب انجینئرز، محکمہ تعلیم، واسا اور ستھرا پنجاب کے نمائندگان شامل ہوں گے۔ کمیٹی سڑکوں کی حالت، نکاسی آب، تجاوزات، غیر قانونی کھدائی اور سڑکوں کو نقصان پہنچانے والے دیگر عوامل کی نشاندہی کرکے ان کے فوری تدارک کو یقینی بنائے گی۔
ڈپٹی کمشنر نے کہا کہ سڑکوں کو محفوظ، صاف اور پائیدار رکھنا صرف ایک محکمے کی ذمہ داری نہیں بلکہ تمام متعلقہ اداروں کو مشترکہ طور پر اپنا کردار ادا کرنا ہوگا۔ انہوں نے افسران کو ہدایت کی کہ سڑکوں کی باقاعدگی سے نگرانی کی جائے اور کسی بھی خرابی یا نقصان کی صورت میں فوری کارروائی عمل میں لائی جائے۔