لیہ: ڈی ایچ کیو ہسپتال لیہ میں مریضوں کو بہتر سہولیات کی فراہمی کے لیے تھل انڈسٹریز کی جانب سے 3 نئے ایئر کنڈیشنرز عطیہ کیے گئے۔ ایڈیشنل ڈپٹی کمشنر میونسپل سروسز شبیر احمد ڈوگر نے ایئر کنڈیشنرز وصول کرتے ہوئے انہیں میڈیکل سپرنٹنڈنٹ ڈی ایچ کیو ہسپتال ڈاکٹر حیات اللہ کے حوالے کر دیا۔اس موقع پر تھل انڈسٹریز کے ڈپٹی جنرل منیجر بشیر حیدر اور سوشل کمیونٹی رسپانسبلٹی کے نمائندہ احتشام الحق بھی موجود تھے۔ایڈیشنل ڈپٹی کمشنر شبیر احمد ڈوگر نے کہا کہ دکھی انسانیت کی خدمت ایک عظیم فریضہ ہے، جبکہ مخیر حضرات اور صنعتی اداروں کی جانب سے صحت کے شعبہ میں تعاون قابل تحسین اقدام ہے۔ انہوں نے کہا کہ عطیہ کیے گئے ایئر کنڈیشنرز سے ہسپتال میں زیر علاج مریضوں اور ان کے لواحقین کو بہتر اور آرام دہ ماحول میسر آئے گا۔انہوں نے تھل انڈسٹریز کی جانب سے فلاحی سرگرمیوں میں تعاون کو سراہتے ہوئے کہا کہ دیگر مخیر حضرات اور ادارے بھی عوامی فلاح و بہبود کے منصوبوں میں اپنا کردار ادا کریں تاکہ سرکاری اداروں میں عوام کو مزید بہتر سہولیات فراہم کی جا سکیں۔
