لیہ: وزیر اعلیٰ پنجاب مریم نواز شریف کے گرین پنجاب انشیٹو کے تحت ضلع لیہ میں موسم برسات کی شجرکاری مہم بھرپور انداز میں جاری ہے، جبکہ ضلع لیہ شجرکاری کے حوالے سے فرنٹ فٹ پر ہے۔ ڈپٹی کمشنر لیہ آصف علی ڈوگر نے جی او آر میں شجرکاری مہم کے سلسلہ میں پودا لگایا۔ اس موقع پر ایڈیشنل ڈپٹی کمشنرز عابدہ فرید، شبیر احمد ڈوگر، اسسٹنٹ کمشنر زوہیب کریم، سی ای او تعلیم ڈاکٹر محمد قیوم، ڈپٹی ڈائریکٹر تعلقات عامہ نثار احمد خان، ڈپٹی کنزرویٹر فاریسٹ سجاد حیدر شاہ، فاریسٹ پروٹیکشن آفیسر عبدالعزیز، فاریسٹ سٹاف اور بوائز سکاؤٹس طلباء نے بھی پودے لگائے۔
اس موقع پر ڈپٹی کمشنر آصف علی ڈوگر نے کہا کہ اربن پلانٹیشن مہذب معاشروں کی پہچان ہے، جبکہ موسمیاتی تبدیلی اور گلوبل وارمنگ کے پیش نظر درختوں اور جنگلات کی اہمیت مزید بڑھ گئی ہے۔ وزیر اعلیٰ پنجاب مریم نواز شریف کا گرین پنجاب وژن موسمیاتی تبدیلی کے اثرات سے نمٹنے اور ماحولیاتی تحفظ کے لیے اہم اقدام ہے، جسے اجتماعی کوششوں سے ہی کامیاب بنایا جا سکتا ہے۔
انہوں نے کہا کہ ضلع لیہ میں شجرکاری کے فروغ کے لیے بھرپور اقدامات جاری ہیں۔ لیہ شہر کے پارکوں، گرین بیلٹس اور سرکاری خالی پلاٹوں پر مزید پودے لگائے جائیں گے، جبکہ لگائے گئے پودوں کی نگہداشت اور حفاظت بھی یقینی بنائی جائے گی۔
ڈپٹی کمشنر آصف علی ڈوگر نے کچہری روڈ پر جاری شجرکاری مہم کا بھی معائنہ کیا اور لگائے گئے پودوں کا جائزہ لیا۔ انہوں نے محکمہ جنگلات کی کاوشوں کو سراہتے ہوئے ہدایت کی کہ زیادہ سے زیادہ پودے لگانے کے ساتھ ان کی مناسب دیکھ بھال اور حفاظت کو بھی یقینی بنایا جائے۔
