لیہ: ضلعی انتظامیہ لیہ کے زیر اہتمام پاکستان، سعودی عرب اور ترکیہ کے مابین مکہ جوائنٹ ڈیفنس معاہدے کے خیرمقدم کا سلسلہ جاری ہے۔ اس سلسلے میں تحصیل چوبارہ اور تحصیل کروڑ میں کیک کاٹنے کی تقریبات منعقد کی گئیں۔
میونسپل کمیٹی چوبارہ میں اسسٹنٹ کمشنر چوبارہ ذوالفقار صابر کی زیر قیادت جبکہ میونسپل کمیٹی فتح پور میں اسسٹنٹ کمشنر تحصیل کروڑ اصغر علی چیمہ کی زیر قیادت کیک کاٹنے کی تقریبات منعقد ہوئیں۔ تقریبات میں مختلف محکموں کے افسران اور نمائندگان نے شرکت کی۔
اس موقع پر پاکستان، سعودی عرب اور ترکیہ کے قومی پرچموں سے مزین کیک کاٹے گئے۔ اسسٹنٹ کمشنرز ذوالفقار صابر اور اصغر علی چیمہ نے کہا کہ مکہ جوائنٹ ڈیفنس معاہدہ تینوں ممالک کے مضبوط برادرانہ تعلقات، باہمی تعاون اور علاقائی امن و استحکام کے عزم کی علامت ہے۔
انہوں نے کہا کہ پاکستان، سعودی عرب اور ترکیہ کے درمیان بڑھتا ہوا تعاون مسلم دنیا کے اتحاد اور اجتماعی سلامتی کے لیے اہم پیش رفت ہے۔ تقریبات کے اختتام پر تینوں برادر ممالک کی سلامتی، ترقی، خوشحالی اور مزید مضبوط تعلقات کے لیے نیک خواہشات کا اظہار کیا گیا۔
