اسلام آباد: اگست 2026 پاکستانی عوام کے لیے تعطیلات کے حوالے سے اہم مہینہ ثابت ہونے جا رہا ہے، جہاں یومِ آزادی سمیت مجموعی طور پر 12 تعطیلات کا امکان ظاہر کیا گیا ہے۔
محکمہ موسمیات پاکستان کے مطابق ربیع الاول 1448 ہجری کے چاند کی رویت سے متعلق پیشگوئی کی گئی ہے کہ یکم ربیع الاول 15 اگست بروز ہفتہ ہونے کا امکان ہے، جبکہ 12 ربیع الاول 26 اگست بروز بدھ متوقع ہے۔ محکمہ موسمیات کے مطابق 13 اگست کی شام ربیع الاول کا چاند نظر آنے کے امکانات نہیں ہیں، تاہم ربیع الاول کے آغاز اور چاند کی رویت کا حتمی اعلان مرکزی رویت ہلال کمیٹی کرے گی۔
حکومت پاکستان کی جانب سے 2026 کے لیے جاری سرکاری تعطیلات کے نوٹیفکیشن کے مطابق عید میلاد النبی ﷺ کے موقع پر 25 اگست بروز منگل سرکاری تعطیل مقرر ہے۔
دوسری جانب 14 اگست بروز جمعہ یومِ آزادی کی سرکاری تعطیل ہوگی، جس کے بعد 15 اور 16 اگست ہفتہ اور اتوار کی ہفتہ وار تعطیلات ہوں گی۔ اس طرح شہریوں کو مسلسل تین روز کی تعطیلات میسر آنے کا امکان ہے۔
اگست 2026 میں دو وفاقی سرکاری تعطیلات اور ہفتہ وار تعطیلات کو شامل کیا جائے تو مجموعی طور پر 12 چھٹیوں کی توقع کی جا رہی ہے۔ تاہم ربیع الاول اور عید میلاد النبی ﷺ سے متعلق تاریخ کے حوالے سے حتمی فیصلہ مرکزی رویت ہلال کمیٹی کے اعلان کے بعد ہی ہوگا۔
