لَیَّہ : ڈپٹی کمشنر آصف علی ڈوگر کی زیر صدارت ریونیو امور کے حوالے سے اجلاس منعقد ہوا۔ اجلاس میں ایڈیشنل ڈپٹی کمشنر ریونیو ڈاکٹر عابدہ فرید، اسسٹنٹ کمشنرز رانا زوہیب کریم، اصغر علی چیمہ، ذوالفقار صابر اور دیگر متعلقہ ریونیو افسران نے شرکت کی۔اجلاس میں ای آبیانہ بلز کی درستگی، مختلف ریونیو معاملات، سرکاری واجبات کی وصولی، ریونیو ریکارڈ کی درستگی، افسران کی کارکردگی اور مختلف امور پر ہونے والی پیش رفت کا تفصیلی جائزہ لیا گیا۔ڈپٹی کمشنر آصف علی ڈوگر نے متعلقہ افسران کو ہدایت کی کہ ای آبیانہ بلز کی درستگی کا عمل قواعد و ضوابط کے مطابق شفاف اور میرٹ پر مکمل کیا جائے، جبکہ ریونیو ریکارڈ کی بروقت جانچ اور درستگی کو بھی یقینی بنایا جائے۔انہوں نے سرکاری واجبات کی وصولی کے عمل کو مزید تیز کرنے اور مقررہ اہداف کے حصول کے لیے مؤثر اقدامات کرنے کی ہدایت کی۔ ڈپٹی کمشنر نے کہا کہ تمام ریونیو امور قانون اور میرٹ کے مطابق بروقت نمٹائے جائیں اور افسران فیلڈ میں مؤثر نگرانی کے ذریعے سرکاری واجبات کی وصولی، ریکارڈ کی درستگی اور دیگر ریونیو معاملات پر خصوصی توجہ دیں۔انہوں نے مزید ہدایت کی کہ ای آبیانہ بلز کی درستگی سے متعلق موصول ہونے والی درخواستوں پر ترجیحی بنیادوں پر کارروائی کرتے ہوئے درستگی کا عمل جلد مکمل کیا جائے تاکہ کاشتکاروں کو کسی قسم کی دشواری کا سامنا نہ کرنا پڑے۔
