لَیَّہ (نمائندہ لیہ ٹی وی ) اسسٹنٹ کمشنر/سیکرٹری آر ٹی اے رانا زوہیب کریم نے ٹرانسپورٹ قوانین پر عملدرآمد اور مسافروں کے تحفظ کے حوالے سے فیلڈ ٹیموں کی کارکردگی کا جائزہ لیا۔ انہوں نے مختلف روٹس پر گاڑیوں کی چیکنگ کرنے والی ٹیموں کو ہدایت کی کہ قوانین کی خلاف ورزی کرنے والی گاڑیوں کے خلاف بلاامتیاز قانونی کارروائی عمل میں لائی جائے۔اسسٹنٹ کمشنر/سیکرٹری آر ٹی اے رانا زوہیب کریم نے کہا کہ مسافروں سے زائد کرایہ وصول کرنے والی گاڑیوں کے خلاف کارروائی کی جائے، جبکہ ہر گاڑی میں مقررہ کرایہ نامہ نمایاں طور پر آویزاں ہونا چاہیے تاکہ مسافروں کو کرایوں سے متعلق مکمل آگاہی حاصل ہو۔انہوں نے کہا کہ بغیر روٹ پرمٹ یا روٹ پرمٹ کی خلاف ورزی کرنے والی گاڑیوں کے خلاف بھی قانون کے مطابق کارروائی یقینی بنائی جائے۔ مسافروں کے جان و مال کے تحفظ کے لیے گاڑیوں کو مقررہ رفتار کی پابندی کروائی جائے جبکہ اوور اسپیڈنگ سمیت ٹریفک قوانین کی خلاف ورزی کرنے والی گاڑیوں کے چالان کیے جائیں۔رانا زوہیب کریم نے فیلڈ ٹیموں کو ہدایت کی کہ مسافروں کے جان و مال کے تحفظ اور محفوظ سفری سہولیات کی فراہمی کے لیے گاڑیوں کی چیکنگ کا عمل مؤثر اور مسلسل جاری رکھا جائے اور کسی بھی خلاف ورزی پر بلاامتیاز کارروائی عمل میں لائی جائے۔
