ملتان (نمائندہ) ڈپٹی کمشنر ملتان ڈاکٹر فیصل سلیم نے پراپرٹی رجسٹریوں میں ٹیکس چوری کے خلاف بھرپور کارروائی کا فیصلہ کر لیا ہے۔ انہوں نے مقررہ شرح سے کم ٹیکس ادا کرنے والے پراپرٹی مالکان اور وثیقہ نویسوں کے خلاف گھیرا تنگ کرنے کی ہدایت جاری کر دی ہے۔
ڈپٹی کمشنر کے مطابق پراپرٹی کی غلط ویلیو درج کرا کے ٹیکس چوری کرنے والوں کو نوٹس جاری کر دیے گئے ہیں جبکہ ٹیکس چوری میں ملوث افراد سے ریکوری کا عمل بھی شروع کر دیا گیا ہے۔
ڈاکٹر فیصل سلیم نے کہا کہ ہر رجسٹرڈ پراپرٹی کی رجسٹری کا مکمل آڈٹ کیا جائے گا اور تمام بے ضابطگیوں کی باریک بینی سے جانچ کی جائے گی۔ انہوں نے شہریوں سے اپیل کی کہ پراپرٹی خرید و فروخت کے تمام ٹیکس خود یا اپنی ذاتی نگرانی میں آن لائن جمع کرائیں تاکہ کسی بھی قسم کی بے ضابطگی سے بچا جا سکے۔
انہوں نے واضح کیا کہ پراپرٹی کی غلط ویلیو درج کرانے والے مالکان کے خلاف قانون کے مطابق مقدمات درج کیے جائیں گے اور ٹیکس چوری کسی صورت برداشت نہیں کی جائے گی۔
ڈپٹی کمشنر ملتان کا کہنا تھا کہ شفاف رجسٹری نظام کے قیام اور قومی خزانے کے تحفظ کے لیے یہ کریک ڈاؤن جاری رکھا جائے گا، جبکہ قانون کی خلاف ورزی کرنے والوں کے خلاف سخت کارروائی عمل میں لائی جائے گی۔
