نو منتخب صدر فلور ملز ایسوسی ایشن ضلع لَیَّہ سیٹھ محمد رضوان اسلم خان کو مبارکبادوں کا سلسلہ جاری

لَیَّہ (نمائندہ لَیَّہ ٹی وی فلور ملز ایسوسی ایشن ضلع لَیَّہ کے نو منتخب صدرسیٹھ محمد رضوان اسلم خان کو عہدہ سنبھالنے پر دوست احباب، فلور ملز مالکان، صنعتکاروں، کاروباری شخصیات اور مختلف شعبہ ہائے زندگی سے تعلق رکھنے والے افراد کی جانب سے مبارکباد دینے کا سلسلہ جاری ہے۔
مبارکباد دینے والوں نے سیٹھ محمد رضوان اسلم خان کے لیے نیک خواہشات کا اظہار کرتے ہوئے امید ظاہر کی کہ وہ اپنی قیادت، تجربے اور صلاحیتوں کو بروئے کار لاتے ہوئے فلور ملز انڈسٹری کے مسائل کے حل، کاروباری برادری کے مفادات کے تحفظ اور ضلع لَیَّہ میں صنعت کی ترقی کے لیے مؤثر کردار ادا کریں گے۔
اس موقع پر نو منتخب صدرسیٹھ محمد رضوان اسلم خان نے مبارکباد دینے والے تمام دوستوں، ساتھیوں اور فلور ملز مالکان کا شکریہ ادا کرتے ہوئے کہا کہ وہ ایسوسی ایشن کے تمام اراکین کے اعتماد پر پورا اترنے کی ہر ممکن کوشش کریں گے۔ انہوں نے کہا کہ ان کی اولین ترجیح عوام کوحکومتی ایس او پیز اور حفظانِ صحت کے اصولوں کے مطابق معیاری آٹے کی مسلسل فراہمی کو یقینی بنانے کے لیے اپنا بھرپور کردار ادا کرنا ہے۔
انہوں نے مزید کہا کہ فلور ملز ایسوسی ایشن حکومت اور فلور ملز مالکان کے درمیان پل کا کردار ادا کرے گی تاکہ باہمی مشاورت، اعتماد اور مؤثر رابطے کے ذریعے صنعت کو درپیش مسائل کا بروقت حل نکالا جا سکے۔ ان کا کہنا تھا کہ وہ ملز مالکان کے جائز مسائل متعلقہ حکام تک مؤثر انداز میں پہنچائیں گے اور حکومتی پالیسیوں پر عمل درآمد کے لیے بھی بھرپور تعاون کریں گے تاکہ عوام کو مناسب قیمت پر معیاری آٹے کی فراہمی یقینی بنائی جا سکے۔
سیٹھ محمد رضوان اسلم خان نے اس عزم کا اظہار کیا کہ وہ ایسوسی ایشن کو مزید فعال، مضبوط اور متحد بنائیں گے اور تمام فیصلے مشاورت، شفافیت اور اجتماعی مفاد کو مدنظر رکھتے ہوئے کیے جائیں گے۔