لیہ(نمائندہ لیہ ٹی وی) ڈپٹی کمشنر لیہ آصف علی ڈوگر نے کہا ہے کہ میٹرک سالانہ امتحان میں ضلع لیہ کے ہونہار طلبہ کی نمایاں کامیابی پورے ضلع کے لیے باعثِ فخر اور خوش آئند ہے پوزیشن ہولڈر طلبہ نے اپنی محنت، لگن اور بہترین تعلیمی کارکردگی سے نہ صرف اپنے والدین اور اساتذہ بلکہ ضلع لیہ کا نام بھی روشن کیا ہے۔ انہوں نے یہ بات نمایاں کامیابی حاصل کرنے والے طلبہ کی حوصلہ افزائی کے سلسلہ میں منعقدہ اجلاس کی صدارت کرتے ہوئے کہی۔ اس موقع پر ڈسٹرکٹ ایجوکیشن آفیسر گل شیر، پرنسپل ڈی پی ایس طاہرہ ذوالفقار، ڈسٹرکٹ ناظر اطہر بیگ و دیگر موجود تھے۔ ڈپٹی کمشنر لیہ آصف علی ڈوگر نے تعلیمی بورڈ ڈیرہ غازی خان کے میٹرک سالانہ امتحان میں نمایاں کامیابی حاصل کرنے والے ضلع لیہ کے پوزیشن ہولڈر طلبہ کو مبارکباد پیش کرتے ہوئے کہا کہ عبداللہ سلیم کا بورڈ بھر میں پہلی پوزیشن جبکہ میراب زہرا اور سید محمد جون عباس نقوی کا مجموعی طور پر تیسری پوزیشن حاصل کرنا ضلع لیہ کے لیے باعثِ فخر اعزاز ہے۔ انہوں نے کہا کہ یہ کامیابی طلباء و طالبات کی انتھک محنت، والدین کی بہترین تربیت اور اساتذہ کی مخلصانہ رہنمائی کا ثمر ہے۔ ڈپٹی کمشنر نے کہا کہ کامیابی مسلسل محنت، نظم و ضبط اور بلند حوصلے کا نتیجہ ہوتی ہے۔ڈپٹی کمشنر نے کہا کہ طلبہ اپنی تعلیمی صلاحیتوں کو مزید نکھاریں اعلیٰ تعلیم حاصل کریں اور اپنی قابلیت کو ملک و قوم کی ترقی کے لیے بروئے کار لائیں تاکہ وہ مستقبل میں بھی ضلع لیہ کا نام روشن کرتے رہیں۔ ڈپٹی کمشنر آصف علی ڈوگر نے مزید کہا کہ ضلع لیہ کی طالبات کا نمایاں پوزیشنیں حاصل کرنا اس بات کا ثبوت ہے کہ ہماری بیٹیاں تعلیم کے میدان میں کسی سے پیچھے نہیں۔ ایک تعلیم یافتہ بیٹی نہ صرف اپنے خاندان بلکہ پورے معاشرے کی ترقی میں اہم کردار ادا کرتی ہے، اس لیے بچیوں کی تعلیم پر خصوصی توجہ دینا ہم سب کی مشترکہ ذمہ داری ہے۔ ڈپٹی کمشنر نے پوزیشن ہولڈر طلبہ و طالبات، ان کے والدین، اساتذہ اور متعلقہ تعلیمی اداروں کو شاندار کامیابی پر مبارکباد دیتے ہوئے کہا کہ اساتذہ کی محنت اور والدین کی حوصلہ افزائی ہی باصلاحیت طلبہ کی کامیابی کی بنیاد بنتی ہے۔ اس موقع پر ڈسٹرکٹ ایجوکیشن آفیسر گل شیر نے بریفنگ دیتے ہوئے بتایا کہ سائنس گروپ (بوائز) میں عبداللہ سلیم نے 1191 نمبر حاصل کرکے بورڈ بھر میں پہلی پوزیشن حاصل کی، جبکہ گورنمنٹ ماڈل ہائر سیکنڈری سکول لیہ کے سید محمد جون عباس نقوی نے 1189 نمبر حاصل کرکے مشترکہ طور پر تیسری پوزیشن حاصل کی۔ سائنس گروپ (گرلز) میں گورنمنٹ گرلز ہائی سکول ریلوے اسٹیشن کروڑ نمبر 1، لیہ کی میراب زہرا نے 1189 نمبر حاصل کرکے مشترکہ طور پر پہلی جبکہ ڈی پی ایس گرلز ونگ لیہ کی طالبہ عائشہ امان نے دوسری پوزیشن حاصل کی، جبکہ گورنمنٹ گرلز ہائی سکول کوٹ سلطان (لیہ) کی امائمہ عباس نے 1187 نمبر حاصل کرکے مشترکہ طور پر تیسری پوزیشن حاصل کی۔ جنرل گروپ (بوائز) میں محمد صہیب نے 1073 نمبر حاصل کرکے تیسری پوزیشن اپنے نام کی۔
