لَیَّہ: عوامی شکایات پر ڈی سی آفس کا اہلکار معطل، پٹواری اور گرداور کے تقرر میں بھی تبدیلیاں

لَیَّہ(نمائندہ لیہ ٹی وی ) ڈپٹی کمشنر لَیَّہ آصف علی ڈوگر نے ریونیو معاملات سے متعلق عوامی شکایات کا نوٹس لیتے ہوئے ڈی سی آفس ایڈجسٹمنٹ برانچ کے اہلکار محمد شریف کو فوری طور پر معطل کر دیا، جبکہ چوبارہ سٹی کے پٹواری اختر بلوچ کو چارج چھوڑنے کے احکامات بھی جاری کر دیے۔
تفصیلات کے مطابق ڈپٹی کمشنر نے عوامی شکایات کی روشنی میں انتظامی کارروائی کرتے ہوئے فتح پور سٹی کے گرداور اسلم جاوید سے گرداوری کا اضافی چارج واپس لے کر ان کی بطور پٹواری تعیناتی کے احکامات جاری کر دیے۔
ڈپٹی کمشنر آصف علی ڈوگر نے واضح کیا کہ سرکاری امور میں غفلت، بدعنوانی اور عوامی مسائل میں غیر ضروری رکاوٹ کسی صورت برداشت نہیں کی جائے گی۔ انہوں نے کہا کہ عوام کو شفاف، بروقت اور بہتر ریونیو خدمات کی فراہمی ضلعی انتظامیہ کی اولین ترجیح ہے اور اس سلسلے میں کوتاہی برتنے والے اہلکاروں کے خلاف بلاامتیاز کارروائی جاری رہے گی۔