لَیَّہ(نمائندہ لیہ ٹی وی)جماعت اسلامی شعبہ خواتین کے زیر اہتمام پٹرولیم لیوی، مہنگائی اور بڑھتی ہوئی اشیائے ضروریہ کی قیمتوں کے خلاف احتجاجی ریلی نکالی گئی۔ ریلی دفتر جماعت اسلامی سے شروع ہو کر چوک اعظم روڈ پر اختتام پذیر ہوئی، جس میں خواتین، بچوں اور جماعت اسلامی کے کارکنان کی بڑی تعداد نے شرکت کی۔
ریلی کے شرکاء نے پٹرولیم مصنوعات کی قیمتوں میں کمی اور مہنگائی کے خلاف پلے کارڈز اور بینرز اٹھا رکھے تھے۔ مظاہرین نے حکومت سے مطالبہ کیا کہ پٹرولیم لیوی میں کمی کی جائے اور عوام کو مہنگائی سے فوری ریلیف فراہم کیا جائے۔
ریلی سے خطاب کرتے ہوئے ضلعی ناظمہ جماعت اسلامی شعبہ خواتین زرتاشیہ ندیم نے کہا کہ ریاست ماں کی مانند ہوتی ہے، لیکن موجودہ حالات میں عوام کو سہولیات دینے کے بجائے ان سے بنیادی سہولتیں بھی چھینی جا رہی ہیں۔ انہوں نے کہا کہ پٹرولیم مصنوعات کی قیمتوں میں اضافے سے ہر طبقہ شدید متاثر ہوا ہے اور عام آدمی کی زندگی مشکلات کا شکار ہو چکی ہے۔
جماعت اسلامی لَیَّہ شہر کے امیر ڈاکٹر پروفیسر ظفر عالم ظفری نے کہا کہ مہنگائی نے عوام کی قوت خرید ختم کر دی ہے، جبکہ صحت، تعلیم، روزگار اور کاروبار سمیت ہر شعبہ مشکلات سے دوچار ہے۔ انہوں نے حکومت سے مطالبہ کیا کہ پٹرولیم لیوی میں کمی کر کے عوام کو فوری ریلیف دیا جائے۔
چوہدری عاصم اقبال گوجر ایڈووکیٹ نے اپنے خطاب میں کہا کہ پٹرولیم مصنوعات پر عائد بھاری لیوی نے عوام پر اضافی مالی بوجھ ڈال دیا ہے۔ انہوں نے مطالبہ کیا کہ عوامی مفاد کو مدنظر رکھتے ہوئے معاشی پالیسیاں تشکیل دی جائیں تاکہ مہنگائی پر قابو پایا جا سکے۔
ریلی کے اختتام پر شرکاء نے پٹرولیم مصنوعات کی قیمتوں میں کمی، مہنگائی کے خاتمے اور عوامی مسائل کے فوری حل کے حق میں نعرے لگائے۔
