لَیَّہ: وزیراعلیٰ پنجاب مریم نواز شریف کے ویژن کے مطابق "ستھرا پنجاب” پروگرام کے تحت ضلع لَیَّہ میں صفائی سے متعلق آگاہی مہم کا سلسلہ جاری ہے۔ اس سلسلے میں ایڈیشنل ڈپٹی کمشنر میونسپل سروسز / منیجنگ ڈائریکٹر ستھرا پنجاب شبیر احمد ڈوگر نے یونین کونسل نمبر 06، کوٹ سلطان سٹی میں منعقدہ ستھرا پنجاب بیٹھک میں شرکت کی۔
اس موقع پر ستھرا پنجاب کے ڈسٹرکٹ منیجر محمد ندیم اور تحصیل انچارج قدرت اللہ بھی موجود تھے۔ اے ڈی سی شبیر احمد ڈوگر نے کہا کہ ستھرا پنجاب پروگرام کا مقصد صرف صفائی کے اقدامات کرنا نہیں بلکہ شہریوں میں صفائی کا شعور اجاگر کرنا اور اجتماعی ذمہ داری کے احساس کو فروغ دینا بھی ہے۔
انہوں نے کہا کہ صاف ستھرا ماحول صحت مند معاشرے کی بنیاد ہے اور اس مقصد کے حصول کے لیے عوامی تعاون انتہائی ضروری ہے۔ انہوں نے شہریوں کو ستھرا پنجاب پروگرام، صفائی ستھرائی کی اہمیت اور بلوں کی بروقت ادائیگی کے حوالے سے آگاہ کیا۔
ایم ڈی ستھرا پنجاب نے شہریوں پر زور دیا کہ کوڑا کرکٹ گلیوں، سڑکوں اور کھلے مقامات پر پھینکنے سے گریز کریں اور مقررہ ڈسٹ بنز میں ہی ڈالیں، تاکہ صفائی عملہ بروقت کچرا اٹھا سکے اور صفائی کا نظام مزید مؤثر بنایا جا سکے۔
شبیر احمد ڈوگر نے متعلقہ عملے کو ہدایت کی کہ آگاہی مہم کو مزید فعال بنایا جائے اور عوام کے ساتھ مسلسل رابطہ رکھا جائے تاکہ وزیراعلیٰ پنجاب مریم نواز شریف کے وژن کے مطابق ضلع لَیَّہ کو صاف ستھرا اور مثالی بنایا جا سکے۔
ستھرا پنجاب بیٹھک کے شرکاء نے صفائی کے نظام کو کامیاب بنانے، اپنے علاقوں کو صاف رکھنے اور ضلعی انتظامیہ و ستھرا پنجاب ایجنسی کے ساتھ بھرپور تعاون کی یقین دہانی کرائی۔
