لَیَّہ: اسسٹنٹ کمشنر لَیَّہ رانا زوہیب کریم نے کوٹ سلطان سہولت بازار کا معائنہ کیا، جہاں انہوں نے مختلف سٹالز پر اشیائے ضروریہ کی دستیابی، معیار، سرکاری نرخ ناموں اور مقررہ قیمتوں پر فروخت کا جائزہ لیا۔
اسسٹنٹ کمشنر نے سبزی، پھل، آٹا، چینی، گھی، دالوں اور دیگر ضروری اشیاء کی قیمتوں کی پڑتال کی، جبکہ خریداروں سے اشیاء کے معیار اور نرخوں کے حوالے سے بھی معلومات حاصل کیں۔
اس موقع پر رانا زوہیب کریم نے دکانداروں کو ہدایت کی کہ سرکاری نرخ نامے نمایاں جگہوں پر آویزاں کیے جائیں اور تمام اشیائے ضروریہ مقررہ نرخوں پر فروخت کی جائیں۔ انہوں نے متعلقہ افسران کو ہدایت کی کہ سہولت بازار میں معیاری اشیائے ضروریہ کی وافر دستیابی ہر صورت یقینی بنائی جائے۔
بعد ازاں اسسٹنٹ کمشنر نے ٹی ایچ کیو ہسپتال کوٹ سلطان کا دورہ کیا، جہاں انہوں نے ایمرجنسی، مختلف وارڈز، فارمیسی اور دیگر شعبہ جات کا معائنہ کیا۔
انہوں نے ہسپتال میں صفائی ستھرائی کی صورتحال، ڈاکٹرز و طبی عملے کی حاضری، ادویات کی دستیابی اور مریضوں کو فراہم کی جانے والی طبی سہولیات کا جائزہ لیا۔ اسسٹنٹ کمشنر نے زیر علاج مریضوں اور ان کے لواحقین سے ملاقات کرکے علاج معالجہ، ادویات کی فراہمی اور دیگر سہولیات کے بارے میں دریافت کیا۔
رانا زوہیب کریم نے ہدایت کی کہ مریضوں کو بہترین طبی سہولیات، ضروری ادویات کی بلا تعطل فراہمی اور صاف ستھرا ماحول فراہم کیا جائے، جبکہ ڈاکٹرز اور طبی عملہ اپنی ذمہ داریاں دیانت داری اور احساس ذمہ داری کے ساتھ انجام دیں
