مظفرآباد: پاکستان مسلم لیگ (ن) آزاد جموں و کشمیر کے صدر اور نومنتخب رکن قانون ساز اسمبلی شاہ غلام قادر نے کہا ہے کہ مسلم لیگ (ن) آزاد کشمیر میں حکومت بنانے کی پوزیشن میں آچکی ہے اور اسمبلی میں واضح اکثریت حاصل کر رہی ہے۔
شاہ غلام قادر نے آزاد کشمیر کے حالیہ انتخابات، حکومت سازی، آئندہ سیاسی حکمت عملی، ایکشن کمیٹی کے معاملات، اوورسیز کشمیریوں اور عوامی مسائل پر اظہار خیال کیا۔
انہوں نے کہا کہ آزاد کشمیر کے باشعور عوام نے مسلم لیگ (ن) پر بھرپور اعتماد کا اظہار کیا ہے، یہ کامیابی عوامی اعتماد، کارکنوں کی محنت اور جماعت کی سیاسی حکمت عملی کا نتیجہ ہے۔
وزیراعظم آزاد کشمیر کے انتخاب سے متعلق سوال پر شاہ غلام قادر نے کہا کہ وزیراعظم کا فیصلہ آئینی تقاضوں اور جماعتی مشاورت کے مطابق تمام انتخابی مراحل مکمل ہونے کے بعد کیا جائے گا۔ انہوں نے کہا کہ ہر سیاست دان کو آگے بڑھنے کی امید رکھنی چاہیے، مجھے بھی وزیراعظم کے منصب کے لیے اچھی امید ہے، تاہم حتمی فیصلہ مسلم لیگ (ن) کی پارلیمانی پارٹی اور قیادت کرے گی۔
ایکشن کمیٹی کے معاملات پر گفتگو کرتے ہوئے انہوں نے کہا کہ مسائل کا حل موجودہ حکومت، بالخصوص پاکستان پیپلز پارٹی کی ذمہ داری تھی، لیکن وہ اس ذمہ داری کو مؤثر انداز میں ادا نہ کر سکی۔ ان کے مطابق پیپلز پارٹی عوامی توقعات پر پورا نہیں اتر سکی۔
شاہ غلام قادر نے مزید کہا کہ مسلم لیگ (ن) کی حکومت قائم ہونے کے بعد عوام کو درپیش اہم مسائل، آئینی معاملات اور دیگر حساس امور کو آئین، قانون اور جمہوری روایات کے مطابق حل کیا جائے گا۔
اوورسیز کشمیریوں کے حوالے سے انہوں نے کہا کہ بیرون ملک مقیم کشمیری آزاد کشمیر کا قیمتی سرمایہ ہیں، جنہوں نے معیشت، تعمیر و ترقی اور قومی معاملات میں ہمیشہ اہم کردار ادا کیا ہے۔ مسلم لیگ (ن) عوام اور اوورسیز کشمیریوں کے اعتماد پر پورا اترنے کے لیے بھرپور کوشش کرے گی۔
