لیہ (نمائندہ لیہ ٹی وی)دھوری اڈہ کے قریب کراچی سے میانوالی جانے والی مسافر بس تیز رفتاری کے باعث ٹریکٹر ٹرالی سے ٹکرا گئی، جس کے نتیجے میں دو افراد جاں بحق جبکہ ایک شخص شدید زخمی ہو گیا۔ریسکیو 1122 کے مطابق حادثے کی اطلاع ملتے ہی امدادی ٹیمیں فوری طور پر موقع پر پہنچ گئیں اور امدادی کارروائیاں شروع کر دیں۔ ریسکیو اہلکاروں نے خصوصی آلات کی مدد سے بس میں پھنسے ایک شخص کو باہر نکالا، تاہم وہ زخموں کی تاب نہ لاتے ہوئے جاں بحق ہو چکا تھا۔ جاں بحق افراد کی نعشیں ضروری کارروائی کے بعد ٹی ایچ کیو ہسپتال چوک اعظم منتقل کر دی گئیں۔ریسکیو حکام کے مطابق حادثے میں ایک شدید زخمی شخص کو موقع پر ابتدائی طبی امداد فراہم کرنے کے بعد آر ایچ سی مہران دھوری اڈہ منتقل کیا گیا، جہاں ڈاکٹرز نے معائنے کے بعد اس کے جاں بحق ہونے کی تصدیق کر دی۔ جاں بحق افراد کی شناخت محمد زبیر (27 سال)، بس کنڈیکٹر، سکنہ میانوالی، اور محمد عرفان (25 سال)، ٹریکٹر ڈرائیور، سکنہ مظفر گڑھ کے نام سے ہوئی ہے۔ابتدائی تحقیقات کے مطابق حادثہ تیز رفتاری، غیر محتاط اوور ٹیکنگ اور ٹریکٹر ٹرالی سے تصادم کے باعث پیش آیا۔ریسکیو 1122 نے شہریوں سے اپیل کی ہے کہ دورانِ سفر ٹریفک قوانین کی پابندی کریں، رفتار کو محفوظ حد میں رکھیں اور غیر ضروری اوور ٹیکنگ سے گریز کریں تاکہ قیمتی انسانی جانوں کا تحفظ یقینی بنایا جا سکے۔
